Nongstoiñ, K’Lyngkot 12
Ka jingshah ieh khun-swet jong ki shnong ha ki bynta ki thaiñ khappud jong ka Jylla Meghalaya bad Assam ka dei kawei na ki mat ïa kaba kum ki nongshong shnong ha kito ki jaka ki don ïa ka jingbynñiaw kaba jur ïa ka Sorkar Jylla ha kaba la ong ba da ki phew snem mynta kum ki nongshong shnong ki im ïa ki jingeh bad ki jingjynjar.
Ka shnong Umyiap kawei na ki shnong kaba don ha ka thaiñ Langpih jong ka khappud bad ka jylla Assam bad kaba hap ruh hapoh ka Hima Nongmynsaw Syiemship ka dei kawei na ki shnong kaba mad ïa kane ka jingeh, ha kaba hashuwa ban poi sha kane ka shnong la hap ban ïaid lyngba ki surok ba bha jong ki katto katne tylli ki shnong kiba dang hap hapoh ka Assam katba marsien kam ne ïuh kjat sha ki bynta ba la hap hapoh ka Umyiap la sdang satang da ka surok kaba tang da ka khyndew bad kaba long khohruh khohram bad la hap ban ïaid ne kam lyngba ïa ki wahduid kaba pynithuh shai ba ha ki aïom lyur lei lei la hap ban ïaksaid ym tang ki kali hynrei wat haba ïaid kjat ruh kumjuh.
Shuh shuh na ka liang ki nongshong shnong katei ka shnong ki la pynpaw ba katei ka surok khyndew ka pynjynjar shibun ïa ka leit ka wan khamtam haba kit ïa kiba pang ba shitom ha ki aïom lyiur bad ha katei ka shnong ym tang ka surok hynrei ym don wat ka bording jingshai ne umbam umdih ruh kumjuh pynban ki nongshong shnong ki hap ban pyndonkam da ki Solar na ka bynta ka jingshai.
Lah ban kdew hangne ba ha katei ka shnong ki briew ki im jakpoh lyngba ka rep ka riang kynthup ïa u Soh Ñiamtra, sohphan, kwai tympew, u synsar bad kiwei kiwei. Ki riew rangbah jong katei ka shnong kynthup ïa u Bah Kyntiewbor Kharlyngdoh Sordar ka shnong Umyiap bad u Bah Wondar Lyngkhoi haba kren halor kane ka bynta ki la ong ba naduh ba la wan shong shnong ha u snem 1970 ha ka shnong Umyiap ki la shu im ha ka jingsahdien, ym tang katta hynrei haba ki leh ïa kino kino ki kam kaba ki ju trei la shu shah pyndik.
Ki la ong ruh ba man ka por, lada ki kit dieng kit siej ban shna ïing shna sem, ki kit jingkit ha ki kali, ki shah bat khlem kano-kano ka daw bad wat ban poi ruh ha ki jingshah shoh shah dat wat haba la pyni ïa ki kot ki sla kiba bit ba biang ruh. Ki riew rangbah jong ka shnong Umyiap ki la kyntu ïa ka Sorkar Meghalaya ba kan pynbeit noh mardor ïa u pud u sam bad ban pyndep noh kham kloi.
Shuh shuh ki la ong ruh ba ki kali kim ju lah ban ïaid ha ki aiom lyiur namar ka jingktieh jong ka surok, lait noh ki kali kiba don ‘special gear’ bad haba kit ïa kiba pang kiba shitom bad kiba armet ka shem jingeh shibun.
Nangta, ki la ong ruh ba ha kane ka shnong ka bording ïa kaba ki paid nongshong shnong ki la ju angnud naduh mynshuwa haduh mynta ym shym la ïoh satia bad na ka liang jong ki, ki kyrpad jur ïa ka Sorkar Jylla ba kan pynpoi noh khnang ba yn lah ban ïa im lem kumba imlang kiwei.
“Ka Sorkar kam dei ban ñiew shilliang la ki dei ki nongkyndong ne ki nongsor, ki MLA bad ki MDC kim dei ban shu bang tang ka ktien hynrei ki dei ban jngoh lem bad ban shimkhia ïa ki jingdonkam jong u paidbah jong ka thaiñ,” ong kitei ki rangbah.
