Shillong, K’Lyngkot 12
Ka Voice of the People Party (VPP) ka la dawa na ka Sorkar MDA ban pyllait noh mardor ïa ka tulop ba sahteng jong 288 ngut ki nos kiba trei kontrak na ka bynta u bnai Naiwieng bad Nohprah.
“Ka seng namarkata, ka dawa ba ka Sorkar kan pyllait noh mardor ïa ka tulop jong kine ki nos kiba trei kontrak,” ong u nongaiktien ka VPP, Dr. B. Myrboh ha ka kyrwoh ba la pynmih ha ka Lah Sngi U Blei.
Katkum ka jingong jong u, ka jingbym pyllait ïa ka tulop jong ki ka la buh ïa ka jingim bad ka ïing ka sem jong ki ha ki jingeh kiba khraw. Nalor ba rakhe ïa ka Khristmas bad Snem Thymmai kaba khlem pisa, ki nongtrei ki mad jingeh ban pyndap ïa ka jinglut-jingsep kaba ïadei bad ka pule-puthi jong ki khun ki kti jong ki.
“Ka Sorkar kam dei ban klet ba kine ki nos ki hap ban bsa ïalade kumjuh ïa ka ïing ka sem jong ki. Ka long kaba sngewsih jur bad kaba hap ban pynrem ba ki nongtrei kiba shakri ïa kiwei pat ki para nongshong shnong ki shah iehnoh ha ka Sorkar,” bynrap u Dr. Myrboh.
Ka VPP ka la kyntu ïa ka Sorkar Jylla ban buh hakhmat eh ïa ka jingsiew tulop, da kaba ban jur halor ka jingdonkam ban aiti sha ki nongrim jong ka synshar-khadar.
“Dei haba ïadei bad kane ka jinglong-jingman ba ka VPP ka ju ai jingmut ïa ka Sorkar Jylla ban kiar na ka jingpynlut kaba lut-phut hynrei ban aiti sha ki nongrim jong ka synshar-khadar,” ong u Dr. Myrboh.
