Shillong, K’Lyngkot 12
Ka North Eastern Hills University Students Union (NEHUSU) bad ka Khasi Students’ Union NEHU Unit, ha ka 12 tarik u Kyllalyngkot 2026, ki la dawa na u Lat ka Jylla ban wengkam noh shi syndon ïa u Vice Chancellor ka skulbah, u Prabha Shankar Shukhla da kaba kyntu ban thung noh ïa u Acting Vice Chancellor hapoh katei ka Skulbah.
Ki Samla ki la pynsngew ruh ha u Lat ka Jylla halor ka kaiphod Inquiry Committee kaba la thung da ka Ministry of Education, da kaba kyrpad ban leh eiei noh haba ïadei bad ki kynrum kynram kiba la mih hapoh ka Skulbah NEHU bad ka jingïakynduh jingeh halor ka pla tyngka.
Haba kren sha ki lad pathai khubor, ki samla ka NEHUSU ki la ong ba la kyntu ïa u Lat ka Jylla ban wengkam noh mardor ïa u Vice Chancellor, da kaba pynpaw ba u la pep trei haduh 422 sngi .
Ki la ong ruh ba ka jingpep trei jong u ne u Vice Chancellor ka la pynpulom lut ïa ki kam ki jam ha ka skulbah baroh kawei.
“Ngi kyrpad jur ba dei ban wengkam noh ïa u Prof.Shankar Shukla kum u Vice Chancellor ka North Eastern Hills University,” la ong ki samla.
Kine ki samla katei ka Skulbah ki la kyrpad ruh ban thung ïa u Acting Vice-Chancellor katkum ka NEHU Status, hadien ka jingiehnoh kam jong u Pro Vice-Chancellor ha ka 15 tarik u Nohprah, 2025.
Lah ban kdew hangne, ka jingdkoh treikam jong ka Skulbah North Eastern Hills University ka la ïaid mynta la bun tylli ki snem, khamtam hadien ka jingïakhih shong shah thngan jong ki samla pule ka tei ka Skulbah ha u snem 2024, lem bad ka jingjah rngai u Vice Chancellor jong ka Skulbah, kata u Prof.Prabha Shankar Shukla.
Nalorkata, ka jingiehnoh kam ki katto-katne ngut ki ophisar, ka la wanrah ka jingeh ïa katei ka Skulbah bad khamtam ïa ki samla pule kiba don mynta.
Haba kylli ki Samla ki la ong, “Ïa mynta hi ngi dangkwah ban ïakynduh shuwa ïa u Lat, u Myntri Rangbah ka Jylla hynrei lada kine ki jingdawa jong ngi kim seisoh ngin sa shim pat da kiwei ki sienjam”.
Kumba la pyntip da u Chairman ka Inquiry Committee ha ka 28 tarik Naiwieng 2024, la ai por 15 sngi ïa ka committee ba kan pyndep ïa ka kaiphod hynrei haduh mynta ïa ka kaiphod ka Inquiry Committee ym pat shym la aiti lane pynsngew paidbah, lane don kano-kano ka jingpynshai na ki bor khmih halor ka jinglong jingman jong ka. Ka jingpynslem ban pynmih ïa ka jingshem ka Committee ka la wanrah ïa ka jingartatien, jingbym shaniah bad ka jingbym skhem ki bor pynïaid kam hapoh ka University. Ngi kyrpad da kaba burom ba dei ban pynshai noh mardor ïa ka jinglong jingman ka kaiphod ka Inquiry Committee bad ba dei ban shim ïa ki sienjam khlem da pynslem shuh, na ka bynta ka jing treikam kaba shai, kaba don jingkitkhlieh bad kaba lah ban shaniah”.
