Shillong, K’Lyngkot 12
Ka Hynñiewtrep Youths’ Council ka la pynrem jur ïa ka Sorkar Jylla lyngba ka tnad ka koit ka khia ka bym shym siew tulop ïa ki Nos ba trei kontrak naduh u bnai Risaw, 2025 bad ruh ka bym pyni kano-kano ka jingthoh watla hadien ka jingkut noh ka por ba kin trei naduh u bnai Risaw, 2025.
Ha ka kyrwoh ba la phah ha ka 12 tarik u Kyllalyngkot 2026, da u Bah Roykupar Synrem, President u la ong “Kane ka jingleh ka long ka jingïuhroit bad jingleh beiñ da ka Sorkar”.
“Ban pyntrei khlem da siew tulop bad khlem ki jingthoh jingtar ne hukum ka long ka jingpynkheiñ ïa ki aiñ kiba ïadei bad ki nongtrei bad kumjuh ruh ka jingpynkheiñ ïa ka long briew man briew. Ban shu kular da ka ktien bad hukum khlem jingthoh kam long kaba dei bad ïahap ruh ban pyntrei khlem jingsiew da ki bnai” la ong u Bah Roykupar.
U Bah Roykupar u la pynkynmaw ruh ïa ki kular jong ka Sorkar kaba kam ba ka buh ïa ka koit ka khiah kum ka ba hakhmat eh hynrei kumno pat ka nud ban pyntrei ïa ki nongtrei kum ki Nos khlem ka jingsiew tulop, kaba la buh jingeh ïa ki ïing ki sem jong ki bad ktah ruh ïa ka bor pyrkhat.
U la banjur “Kane ka jingleh ka pynpaw pyrthei ïa ka jingbymler bad jingleh bym suidñiew jong ka tnad ba dei peit ha ryngkat ka Sorkar hi baroh kawei”.
“Ngi dawa ba dei ban siew noh mardor ïa ka tulop bad kiwei ki jingsiew naduh u bnai Risaw, 2025. Dei ban ai noh ïa ka jingthoh ban bteng biang ïa ka kam ba kin trei bad ban pynshitom ïa ki ophisar kiba donkti ha kane ka jinglehbeiñ bad ïuhroit ïa ki Nos ba trei kontrak” la bynrap biang u Bah Roykupar.
Nalorkata, u la ong ba ki nongtrei hapoh ka tnad ka koit ka khiah kim dei ki mraw, “Ïa ka hok jong ki ngin nym shah ban ïuhroit”.
