Shillong, K’Lyngkot 12
Ki Khasi kiba shong ba sah ha Karbi Anglong, Assam ki la dawa na ka Sorkar Assam ba kin pyntreikam ïa ki mat jingdawa ha kane ka ilekshon MLA ban sa long shen mynta u snem ha Assam.
Haba ïakren bad u Bah Pynshngain Rattane uba dei u President ka United Khasi Peoples Organisation u la ïathuh ba ki Khasi ba sah ha Karbi Anglong ki la phah dorkhas sha u MLA jong ki ba mihkhmat ha Karbi Anglong ban dawa na ka Sorkar Assam ban thung MDC shu sieh na ki Khasi ha Karbi Anglong Autonomous District Council.
U la ïathuh ba ki la dawa ïa ka Khasi Bhavan ha Diphu bad mynta la ïoh jaka na ka Sorkar Assam shi bikha bad kin sa sdang tei noh.
Shuh shuh u la ïathuh ba ka Karbi Anglong Autonomous District Council ruh ka la mang pisa kumba shi klur ban tei ïa ka Khasi Culture Hall ha Amri kaba la ïoh ar bikha ka jaka ha ka jinglut ba shi klur tyngka.
U Bah Pynshngain u la ïathuh ruh ba ki Khasi ki kwah ïa u MDC shu sieh namar un kren ïa ka jingeh jong ki Khasi ha Karbi Anglong namar ki Khasi ki la don palat arphewsan hajar ngut.
U la pyntip ruh ba ki Khasi ki la dawa ruh ïa ka bhah thungkam ban ïoh kam ha Karbi Anglong Autonomous District Council. Shuh shuh u la ïathuh ba ki la dawa ba ïa ka ktien Khasi dei ban ithuh ban ïoh pule bad thoh da ka ktien Khasi ha ki skul namar haduh mynta ki pule da ktien Karbi.
U don jingkyrmen ba ha kane ka ilekshon ki Khasi kin ïoh ban buh jingdawa ha ki kyrtong khnang ban ïoh ki kam pynroi bad ki jingïada ïa ki haba ki sah ha Karbi Anglong.
