Mawkyrwat, Rymphang 01
Ki paidbah nongshong shnong ka shnong Balat, Mawshylliah bad ki shnong ba marjan hapoh ka Ranikor Civil Sub-Division kiba dei ki shnong kiba don syndah bad ka wah Umngi kiba ju shah ktah man ka por ha ka jingshah rong ki ïing ki sem, ha ka 31 tarik u Kyllalyngkot, 2026 ki la mih paidbah ban pyrshah jur halor ka jingkhlong maw khlong shyiap khlem akor ka kompani Bhagya Traders na Guwahati kaba pyntrei ïa ka jingker kynroh ha shilynter ïa ka wah Umngi na ka bynta ban ïada ïa ki shnong na ka um ha ka por lyuir.
Ha kane ka sngi ki paidbah jong kine ki artylli ki shnong ki la mih ryntih lang naduh ki samla kynthei bad shynrang bad ki longkmie longkpa bad ki nongpynïaid shnong ban leit jurip ïa ki jaka kaba kane ka kompani ka la khlong maw pathar shaphang mihngi jong ka wah Umngi, ka jaka kaba la khang pyrshah ban tih maw tih shyiap da ki bor distrik bad ki shnong naduh mynshwa.
U Bah Koilan Khardewsaw, Rangbah Shnong Balat bad Bah Welbert Syiemlieh Secretary haba kren sha ki lad pathai khubor ki la pynpaw ka jingsngewkhia kaba jur ha kaba ïadei bad jingleh bym suidñiew bad khlong maw khlem akor kane ka kompani.
Ki la ïathuh ruh ba ha ki snem ba la dep na ka liang ka shnong Balat bad ki shnong ba marjan ki la leit pyni markhmat bad ka kompani ïa ki jaka ba kin khlong maw, hynrei hadien ba kane ka jingpyntrei ka la ïaid shakhmat, kane ka kompani ka la leh bym suidñiew bad khlong maw naphang na ki jaka kiba lah ban ktah tang namar ban myntoi bad pynsuk ïa ka rukom treikam.
U Bah Koilan Khardewsaw, u la ïathuh ruh ba ha kine ki arphew snem kata naduh u snem 2007 ka la don ka jingkhlong maw khlong shyiap pathar jong ki briew na ka wah Umngi bad lyngba kane ka jingkhlong maw ka la don ka jingshah pynjot jong ki shnong khamtam ka shnong Balat bad u la ïathuh ruh ba katkum ka jingïoh jingkheiñ, ki don haduh kumba 170 tylli ki longïing kynthup ïa ki skul bad ki Aganwadi centre bad ki jaka paidbah kiba la shah rong noh ha ka um bad ka jingkhlong maw thurmur biang jong kane ka kompani ka lah ban wanrah jingma biang sa shisien.
“Ngim khang ïa ka jingpyntrei, hynrei kaei kaba ngi kwah ka long ba ki dei ban khlong maw kumba la bthah bad ban wanrah na ki jaka ba la lum ban pyntrei ïa kine ki jingker kynroh, ym ban khlong na ka wah bad ki jaka kiba lah ban ktah, ong u Bah Koilan.
Kumta na ka liang ki paidbah ha kane ka sngi, ki la khang pyrshah ïa kane ka kompani ban khlong maw biang na kine ki jaka bad ki la ai por 10 sngi ïa ka kompani ba kan pyndap maw biang bad na ka liang ki nongpynïaid ka kompani ki la kular ba kin sa pyndap maw biang ha kine ki jaka ba la khlong.
Sa shisien ka shnong Balat bad ki shnong ba marjan ki buh ka jingkyrpad ïa ka tnad Water Resources ba ka dei ban wan peit wan jngoh ym ban shu shaniah ha kane ka kompani bad ki kyrpad ruh ïa u nongmihkhmat bad ki bor Sorkar ba ki dei ban tuklar lem halor kane ka kam.
