Jowai, Rymphang 01
Ka Elaka Satpator ka khlem pat ai ïa kano kano ka NOC ne No Object Certificate sha ka National Buildings Construction Corporation Limited (NBCC), namar ka dang pyrshang ban don ka jingsngewthuh bad ki paid nongrep kiba shah ktah.
Ïa kane la ong da u Dolloi ka Elaka Satpator Ma Daman Lakashiang haba kren sha ki lad pathai khubor hadien ka jingïalang jong ka Executive Committee ka Elaka kaba la long ha Hall ka Elaka ha Pdengshakap ha ka 31 tarik Kyllalyngkot.
Ha kane ka jingïalang la wan ïashim bynta da ki 30 ngut ki Waheh Shnong ryngkat ki nongkitkam shnong nalor ki riew rangbah ka Elaka.
Ïa kane ka jingïalang ka Elaka Satpator ka la lum hadien ka kynrum kynram halor ka jingker sainar ha khappud bad ka ri Bangladesh ha kaba ka la don ruh ka jingkynnoh ba u Dolloi ka Elaka Satpator u la kam trai ïa ki jaka puta kiba long trai da ki paidbah bad ai jingbit ïa ka Sorkar lyngba ka ophis jong u DC ryngkat bad ka NBCC ban ïaid shakhmat ban shna ïa ka surok ban plie lad ïa ka jingtrei ker sainar shiah.
Haba pynshai sha ki paid ka Elaka halor ka jingkynthoh jong ki katto katne ki nongrep bad Waheh Shnong ba kim ïoh jingtip halor ka jingthmu jong ka Sorkar ban shna ïa ka surok, u Dolloi u la ong ba ki waheh shnong da lade hi don lang ha ki katto katne ki jingïalang ryngkat ki briew jong u DC kumjuh ruh ki waheh shnong jong ki 8 shnong kiba shah ktah kila leit jurip ryngkat ki briew jong ka Sorkar bad ruh u Dolloi.
Halor ka jinglongtrai ka Elaka ïa ka khlaw thang rnga, u Dolloi u la pynshai ba naduh u longshwa manshwa, ïa ka khlaw (thang rnga) bad jaka la pynïaid da ka Elaka ha ryngkat u Dolloi kum u khlieh ka Elaka.
Halor ka jingdawa ba u Dolloi u dei ban weng noh ïa ka jinglong trai ïa katei ka khlaw, ka Elaka Satpator, kala ong ba ka ïengskhem ha ka nongrim ba dei ban pynneh ïa ka riti dustur jong ka Elaka, kata ka khyndew kan neh kan sah jong ka Elaka, katba ki mar rep kin dei jong ki paid nongrep.
