Khliehriat, Rymphang 05
Ki bor pulit ki la ïoh ban sei haduh 18 tylli ki metïap jong ki nongtrei par hadien ka jingbthei hapoh kawei ka par tih dewïong be-aiñ ha East Jaiñtia Hills kaba la jia ha ka step jong ka 5 tarik Rymphang ha kaba la ngeit ruh ba ki don da ki phew ngut ki nongtrei par ha ka por ba katei ka jingjia ka la jia.
Na ka liang ki kynhun ai jingïarap ki dang bteng ban pynlong ka jingwad ïa ki briew kiba ïoh lait im ha kane ka jingjia kaba la jia hapoh kane ka par dewïong kaba don ha Mynsyngat ha ka thaiñ Thangsko, East Jaiñtia Hills kaba hap hapoh Umpleng Police Outpost.
“Hadien ka jingtohkit bniah, la pynthikna ba ka la don ka jingbthei hapoh ka krem dewïong beaiñ ha kaba la suba jur ba da ki phew ngut ki nongtrei par ki la sahkut shapoh,” ong u Superintendent of Police ka District u Vikash Kumar.
Ki kynhun ai jingïarap ki la wan poi mardor sha kane ka jaka bad ha ka jingpyrshang borbah ban ai jingïarap ki la ïoh ban sei haduh 18 tylli ki metïap na katei ka jaka ba la jia ka jingbthei,” u la ong haba bynrap ba la ïoh ban pyllait im ïa uwei u briew uba la ngat ha ka jingmynsaw ïa uba la pynkynriah noh sha Shillong ban ïoh ïa ka jingsumar kaba kham biang.
Ka kynhun na ka National Disaster Response Force (NDRF), ka State Disaster Response Force (SDRF) bad ka Special Rescue Team (SRT) ruh ki dang trei shitom ha katei ka jaka bad ki jingpyrshang ban pyllait im ban lapdien ïa ki briew kiba dang jah rngai.
U SP u la pyntip ba halor kane ka jingjia la rejistar da ka suo motu FIR bad ka jingtohkit ka dang ïaid shakhmat.
Halor kane ka jingjia la rejistar da ka suo motu FIR hapoh thanad Khliehriat katkum ka case no 14/2026 U/s 105/118(2)/3(5) BNS R/W section 21/21(1) MMDR Act R/W section 3 Explosives Substances Act bad ka jingtohkit ka la ïaid shakhmat, u la ong.
Lada don kino kino kiba don jingtip ïa ki briew kiba donkti ha lyndet jong kane ka kam beaiñ, la kyrpad ba kin pyntip mardor sha ki thanad kiba marjan ha kaba yn buhrieh ïa ki kyrteng jong ki bad ban ai ruh sha ki da ka buskit, bynrap u SP.
