Mawkyrwat, Lber 02
Ka Synjuk Rangbah San Shnong Manad Area (SRSMA) kaba kynthup ïa ki 5 tylli ki shnong – ka Manad, Mawbidong, Lummawbah, Pynden Lyngdoh bad Pynden Sohlang ki la pynpaw ïa ka jingbym sngewhun halor ka jingpyntrei ïa ka surok PMGSY Photjaud – Mawbidong kaba don kumba 5 km tam eiei bad kaba dang ïaid shaid – shaid ïa ka jingpyntrei ïa ka jingsiang rong haduh mynta.
U Bah Redy Shylla, President ka Synjuk haba kren sha ki lad pathai khubor u la pynpaw ïa ka jingsngewkhia bad jingbym sngewhun ïa ka jingsiang rong ïa kane ka surok namar ka jingbym biang ki nala, kumjuh ki kynroh surok, nalor nangta ka rukom siang rong kam biang namar ki don ki jaka ki bym skhem bad ba pdang.
Nalor kine, u la ïathuh ruh ba kane ka surok ka khlem poi haduh kut shnong Mawbidong.
Kumta na ka liang ka Synjuk ka kyrpad ïa ka ophis ba ka dei ban shimkhia ban mang pisa ne shna skhim thymmai noh ïa kane ka surok ba dang sah bad ka jingjngai la antad ba ka don tang kumba 1km eiei haduh ba kut.
Kumjuh, ban shna ïa ki nala ha shilynter ka surok bad ki kynroh namarba ka jinglong ka khyndew ha kine ki thaiñ ka long ka dewjem bad tang shu slap ka um kan sa rong noh ïa ka rong bad ka khyndew.
Ka synjuk ka la kyrpad ruh ïa ka ophis ba ka dei ban da wan khmih wan jngoh ïa ka jingpyntrei ïa kane ka surok ban ïa pynbeit lang bad ki paidbah khnang ba kane ka surok kan long shisha ka surok kaba neh bad ka ban ai jingmyntoi ïa ki paidbah kane ka dong ka thaiñ.
