Jowai, Lber 22
Ka Indian Dental Association (IDA) Meghalaya Branch, ka la rakhe ïa ka World Oral Health Day ha Halfway Home kaba don ha shnong Sabahmuswang.
Ha kane ka jingïalang la donlang u Dr. Kyrpang Passah, Dr. Nimshi Rymbai bad Dr. Liberal Dkhar.
La rakhe ïa kane ka prokram ryngkat bad ka Hotel ODC Residency bad ka Tia’s Restaurant and Lounge, Lumpyrtuh, Mihmyntdu, West Jaiñtia Hills.
Haba pdiang sngewbha ïa ki nongïalam jong ka Association, u H.H. Mohrmen, Secretary jong ka Society for Urban and Rural Empowerment (SURE), ka seng kaba pynïaid ïa ka Halfway Home, u la batai lyngkot ïa ki nongwan jngohkai halor kane ka projek, kaba la bei tyngka da ka tnad Social Welfare jong ka Sorkar Jylla.
Ka Halfway Home ka ai jingsumar ïa ki nongpang ki bym donkam shuh ïa ka jingsumar ha ki jaka sumar bad kiba la pynkynriah noh sha la ïing.
U Dr. Kyrpang Passah u la ong ïa ka World Oral Health Day, kaba ju rakhe man la u snem ha ka 20 tarik u Lber bad u la pynpaw ka jingsngewnguh ïa ka seng kaba la ailad ïa ka Association ban rakhe ïa kane ka sngi ryngkat bad ki dkhot jong ka Society kaba donkam ïa ka jingkyrshan.
Ka Association ka la ai sngewbha ruh sha ki dkhot jong katei ka Halfway Home da ki jingai sngewbha bad ka jingbam.
