Nongpoh, Lber 23
Ki bor pulit ka Ri Bhoi District ha ka janmiet jong ka sngi Nyngkong kila pynmih jingpynbna halor ka rukom ïaid bad pynïeng kali ha kaba ïadei bad ka concert jong u Def Leppard ka ban sa long ha ka 25 tarik u bnai Lber, 2026 ha Madan Kurkalang, Ri Bhoi District.
Katkum katei ka jingpynbna, ki bor pulit ki la mana ba yn nym shah satia ïa ki kali ba kin pynïeng marjan bad ka jaka pynlong concert bad baroh ki nongwan peit kai lem bad ki nongleit nongwan ba ki dei ban bud ryntih ïa ka rukom pynïaid bad pynïeng kali ha ki jaka kiba la pynbeit kyrpang katkum ki ‘pass’ ba ki don ba kynthup ruh ïa ka rukom pynhiar ïa ki nongleit concert.
Ki pulit kila mana ruh ïa ki kali ba kim dei ban jam shakhmat (overtaking) ïa ki kali ha ka surokbah ban lait na ka jingdheng kali khamtam ha ki jaka ba marjan bad ka jingpynlong ïa ka concert.
Ha kaba ïadei bad ki kali ar shaka, ki pulit kila bthah ba kin kiar na ka jingpynher sted bad ban ñiah phikir ha ka surokbah la ka dei hashwa ne hadien ba la wai ka concert ruh kumjuh, da kaba maham ba yn leh da kaba tyngeh ïa kiba pynkheiñ bad leh pyrshah ïa kine ki jingbthah.
Shuh shuh, ki pulit kila pyntip ba kan don ruh ka jingpynsangeh ïa ki kali heh naduh Byrnihat ha Ri Bhoi District, nangta de ha East Khasi Hills bad ruh sha West Jaiñtia Hills District ha ka 25 tarik jong u bnai Lber naduh ka por 1 baje nohphai sngi ter ter haduh ka por 11:30 da miet ban pynthikna ïa ka leit ka wan kaba suk bad ban ïada na ka jingdheng kali.
Halor kane ka bynta, ki pulit ki la buh ka jingkyntu ïa ki paidbah baroh ba kin ai ka jingïatreilang kum shi bynta ban pynthikna ïa ka jingshngaiñ bad jingsuk jong ki paidbah nongleit nongwan ha katei ka concert.
