Shillong, Lber 23
U Myntri ka Tnad ka Koit ka Khiah u Bah Wailadmiki Shylla ha ka sngi Nyngkong u la pyllait ïa ka GC-FID technology bad ka Automated Water Analyser, kane ka dei shi bynta ba ka Jylla Meghalaya ka ïakhun ban pynkhlaiñ ïa ka jingpeit bniah bad ka jingshngaiñ ki jingbam bad ka um.
Haba kren ha ka jingïalang jong ka 2nd Technical Session kaba long halor ka phang pdeng “Strengthening food Safety Ecosystem through Science & Awareness” kaba long ha State Food Testing Laboratory Pasteur Hills, u Myntri u la ong ba ki Laboratory ki long kiba donkam tam ban pyntikna ba u paidbah un ïoh ïa ka bam kaba khuid bad kaba bit ba biang.
U Bah Wailad u la kdew ba ka jingpynbha ïa ka rukom bam ka donkam ïa ki buit thymmai bad ki jingpynshai paidbah ryngkat bad ka jingpynlut pisa ha ki kor thymmai bad ka jingpynbit pynbiang ïa ki rukom treikam. Nalor kata u la pynkynmaw ruh ba ka jingshngaiñ ka bam ka long ka kamram ban ïatreilang hapdeng ki bor Sorkar, ki nongkhaïi bad ki nongbam.
Haba kyntu ban kyrshan ïa ki nongseng kam hapoh ka jingïalam u Myntri Rangbah u Conrad K Sangma u la ong ba ki jaka peitbniah ïa ka bam ha ki shnong ki long kiba donkam khnang ban nym pynslem bad ban ym pynlut phut ïa ka pisa.
U la pyntip ruh ba ka Sorkar Jylla ka la mang pisa kumba 4.61 klur ban shna ïa ka R & D Centre na ka bynta ka State Food Testing Laboratory.
U Additional Chief Secretary u Sampath Kumar u la ong ba ka jingpynkhlaiñ ïa ka rukom bishar ïa ka bam kan ïarap ban pynkiew ïa ka jingshalan mar shabar bad ban kyrshan ïa ka kam jngohkai. U la pynpaw ruh ïa ka jingma hadien ka jingwad bniah ba la lap ba don ki khynnah kiba ïoh pang na ka jingjaboh ki pliang ki khiew bad ka um.
Ka Deputy Commissioner jong ka East Khasi Hills ka Kong Rosetta M. Kurbah ka la kdew ïa ki jingjia ba mynshwa ha Puriang bad Sohïong, da kaba ban jur ïa ka jingdonkam ban don ka jingkhuid jingsuba bad ka jingpynsngewthuh paidbah khnang ban ïada na kum kine ki jingjia.
Ha Kane ka jingïalang ka la wan ïashimbynta lang ki nongthaw aiñ, ki riewstad saian bad kiba don bynta ha kane ka kam bad kaba pynskhem biang ïa ka jingkut jingmut jong ka Jylla ban pynbiang ïa ka bam bad ka um kaba shngaiñ ïa ki nongshong shnong.
