Shillong, Lber 24
Ki Khasi kiba shong ba sah ha Karbi Anglong kaba hap ha Jylla Assam ki la buh thong ba lada ka BJP ka wan biang ha ka bor ka dei ban pynrung noh ïa ka ktien Khasi ha ki skul hapoh ka Karbi Anglong Autonomous District Council.
Haba ïakren bad u Pynshngain Rattane uba dei u President ka United Khasi Peoples Organisation kaba dei ka seng ki Khasi ha Karbi Anglong u la ïathuh ba ha kane ka ilekshon MLA ha Jylla Assam ki la buh ka jingdawa ha ki kyrtong jong ka BJP ba lada ki jop kin pynrung ïa ka ktien Khasi ban pule ki khynnah hapoh skul.
U la ïathuh ba lada ka Karbi Anglong Autonomous District Council ka la mynjur, baroh ki skul kiba don tang ki shnong Khasi kin ïoh ban pule ïa ki kot Khasi naduh klas Nursery.
U la ïathuh haba u Chief Executive Member ka Karbi Anglong u la pan ïa ki kot hynrei kim pat don tangba u don jingkyrmen ba kin sa lah ban ïoh ïa ki kot ban pynrung ïa ki kot Khasi ha ki skul ba sah tang ki shnong Khasi.
U la ïathuh ba ha kane ka ilekshon MLA ha ki san tylli ki Constituency ha Karbi Anglong ha ki snem ba la dep la jop lut da ka BJP bad mynta u snem ruh la sngewthuh ba ka BJP kan sa wan biang.
U la ïathuh biang ba ki paidbah ki jied ïa ka BJP namar kane ka seng ka synshar ha Delhi, ha Assam bad wat ha Karbi Anglong Autonomous District Council.
U la pynkynmaw ba ka Karbi Anglong ADC ki la ai jaka shi bika ban shna ïa ka Khasi Bhavan bad ka la ïarap pisa haduh lai lak tyngka na bynta ka tamasa lehniam ki Khasi.
Shuh shuh u la ïathuh ba ka jingthep vote ha Assam ka long kaba jai jai hynrei tang ha khappud ka don ka jingïasngewthuh bakla ba don ki bym treh thep vote.
U la ong lada ym treh thep vote, ki kam pynroi ruh kin nym ïoh shuh na Assam.
Kumban shu pynkynmaw ka jingthep kyrteng ka la kut ha ka 23 tarik mynta u bnai, ka jingthep vote kan long ha 9 tarik Ïaïong, 2026 bad ka jingñiew vote kan long ha ka 4 tarik Jymmang, 2026.
