Shillong, Lber 24
Ka ïingbishar Meghalaya High Court ha ka sngi Ba-ar, kala hukum ïa ki bor ba dei khmih ba kin aiti noh ïa ka Environmental Clearance bad ka Safety Assessment Report jong ka projek pynheh ïa ka ‘runway’ ha Shillong Airport hapoh ka lai taïew haba bishar ïa ka jingïaid ki kam ha ka mukotduma bala mudui.
Ha ka hukum, ka Division Bench ba kynthup ïa ka Chief Justice Revati Mohite Dere bad Justice W Diengdoh, kila shim jingthoh ïa ka jingpynsngew ka Sorkar Pdeng ba ïa ka Environmental Clearance yn sa ai noh shen.
U Deputy Solicitor-General Dr. N Mozika u la pyntip ïa ka ïingbishar ba ka Airports Authority of India (AAI) kala pynkhreh ïa ka Safety Assessment Plan, ka ban sa aiti sha ka Directorate General of Civil Aviation (DGCA) hapoh ka ar ne lai taïew.
Ka DGCA kan sa shong pyrkhat ban ai ïa ka jingbit ban pyntrei ïa kane ka projek, ong u Mozika.
Halor ka jingkyrpad jong u, ka ïingbishar kala pynjlan ban shong bishar biang ïa ka ha ka 22 tarik Ïaïong, 2026.
