Nongstoiñ, Lber 24
Ka Deputy Commissioner (Supply) jong ka West Khasi Hills kala pyntip ba ka Indian Oil Corporation lyngba ka Indane LPG ka pyntip paidbah ïa ka jingpynbna kaba kongsan na ka bynta baroh ki nongpyndonkam LPG.
Ha ka kyrwoh khubor, ka DC kala pynpaw ba katkum ka Indian Oil Corporation lyngba ka Indane LPG namar ka jingkhapngiah shipor jong ka system, la ïohi ba ka jingwan phone sha ka IVRS bad ki missed call booking number ka la kiew haduh 8-10 shah ban ïa kaba ju long ha kaba kane ka la wanrah jingeh ha ka rukom treikam jong ka system.
Shuh shuh la pynpaw bad la kyrpad jur ïa ki nongthied ba kin kiar na kaba pyrshang ban booking bunsien khlem donkam, namar kane ka nang pynkhapngiah shuh shuh ïa ka system.
La pyntip ruh ba ka booking ne invoice ïa ki tyndong LPG thymmai yn shah tang hadien 25 sngi naduh ka tarik ba la pynpoi khatduh. Kino kino ki jingpyrshang ban booking shwa ka 25 sngi ki lah ban ym shah pdiang ha ka system.
Kumta la bthah ïa ki nongthied ba kin peit bniah ïa ka tarik pynpoi khatduh shwa ban buh booking.
Shuh shuh ka kyrwoh khubor ka ong ruh ban pynsuk ïa ka rukom booking bad ban lait na ki jingeh, la kyntu ïa ki paidbah ban pyndonkam ïa kiwei pat ki lad kum ka WhatsApp Booking Indian Oil ONE Mobile App, BBPS Platforms kum ka Amazon Pay, PhonePe, bad Paytm Customer Portal ha cx.indianoil.in
Nangta, ka kyrwoh khubor bala phah la pynpaw bad la ai jingmut ruh ba ka por kaba biang tam ban booking ka long hadien ka por 6 baje janmiet, ha ka por ba duna ki nongpyndonkam.
Shuh shuh ka por hapdeng 10:00 mynmiet haduh 6:00 mynstep la khein kum ka por bym treikam, bad kino-kino ki booking ba la leh ha kane ka por yn sa pyntreikam tang hadien ka por 6:00 mynstep ha ka sngi kaba bud.
La kyntu ruh ba na ka bynta kano-kano ka jingïarap, la ai jingmut ïa ki nongthied ban ïakynduh ïa u nongsam Indane uba jan tam jong ki.
Kumjuh ruh, la kyntu ïa baroh ki nongpyndonkam ban pynthikna ba ki jingdonkam jong ka DAC bad eKYC ki long kiba la pyndep pura, namar yn ym ai cylinder lada kine ki jingïoh jingïarap kim pat biang.
