Shillong, Lber 24
Ki kam tuh kam thiem nalor ki kam thok bad shukor pisa ki dang ïai bteng na kawei ka sngi sha kawei pat bad ïa kane lah ban sakhi na ki jingjia kiba la jia dang ha kine ki sngi bad ki taïew.
Katkum ka khubor ba la ïoh na ki pulit la ong ba u Bah Nishanlang Khonglah u la ai ka jingujor ba ha ka janmiet jong ka 19 tarik mynta u bnai, ki runar bym lah ban ithuh ki la tuh ïa kawei ka pla kaba don kawei ka laptop bad kiwei ki tiar kiba donkam na ka kali jong u, kaba don ïa u registration number ML05-Q-0148 ha Mawlai, Mawroh, Shillong.
Ha kawei pat ka khubor, uwei u nongshong shnong jong kawei ka dong ha nongbah Shillong u la ai ka jingujor ba ha ka 9 tarik jong u bnai Rymphang, ha ka por kumba 12.45 mynsngi, uwei u briew ba la tip kyrteng kum u Asgar u la thok pisa ïa u haduh T.29,000/-.
Na ka liang jong u Bah Peter Wallamkupar Shylla uba na Mawlai Mawdatbaki Nongmali-I, Shillong u la ai ka jingujor ba ha ka 19 tarik mynta u bnai, ki runar bym lah ban ithuh ki la tuh ïa kawei ka pla na ka kali jong u, kaba don ïa u registration number ML05-Y-0742.
Katba na ka liang jong u Naikhatsawsynnia Kharjana, uba dei u nongmihkhmat jong ka RNS Infrastructure Ltd., u la ai ka jingujor ba ha ka step jong ka 9 tarik mynta u bnai, u la lap ba ki runar bym lah ban tip ki dei kiei, ki la tuh ïa ki tiar jong ka mobile tower kiba shongdor haduh kumba T.7,65,359.15p na ka shnong Nongkynjang ha West Khasi Hills.
Ha kawei pat ka khubor, ha ka 22 tarik mynta u bnai, ka la don ka jingujor ba kawei ka arshaka kaba don ïa u registration number ML04-D-7069 ka la shah tuh na ka thaiñ Caroline Colony, Jowai ha West Jaiñtia Hills.
