Shillong, Lber 24
Ka Bharatiya Janata Party (BJP) ha ka Sngi Ba-ar ka la pynpaw ïa ka jingsngewnguh ïa u Lat ka Jylla, u C.H. Vijayashankar uba la mynjur ïa ka rai jong ka Garo Hills Autonomous District Council (GHADC) kaba pynlong kongsan ïa ki syrnot ‘Scheduled Tribe’ (ST) na bynta ki kyrtong ha ka ilekshon sha ka GHADC.
Ha ka kyrwoh khubor, u State General Secretary, Bah Wankitbok Pohshna u la ong, “Ka seng ka kner ïa ka jingsngewnguh kaba khraw sha u Lat ka Jylla, u C.H. Vijayashankar uba la mynjur ïa ka rai ka ban sah kynmaw ha ka histori ba la mynjur da ka GHADC, kaba pynlong kongsan ïa ka syrnot ‘Scheduled Tribe’ ban ïakhun ïa ka ilekshon sha ka District Council. Kane ka rai kaba donkam eh ka pyni ïa ka sienjam ba kongsan ban ïada ïa ki hok ka Riti Synshar bad Lariti jong ki Achik.”
U la kdew ba ïa kane ka ‘Resolution’ la wanrah nyngkong da u MDC ka BJP na Tura, u Bernard Marak, bad hadien la kyrshan da 25 ngut ki MDC ha ka por ba ïatai nia ban pynkylla ïa ka ‘Rule 128’.
“Ka jingkut jingmut kaba ïabeit lang kaba la pyni da ka Council khlem da kheiñ kynhun seng saiñ pyrthei ka pyni ïa ka jingïatylli bad ka jingkut jingmut ban ïada ïa ka jinglong kyrpang ki trai-ri trai-muluk”, la ong u Bah Wankitbok.
Shuh shuh ka BJP ka la kyntu ba ka Khasi Hills Autonomous District Council (KHADC) kan shim ïa kine kijuh ki sienjam.
U Bah Wankitbok u la bynrap, “Ngi pynpaw ka jingkyrmen skhem ba ka KHADC ruh kan shimkhia bha ïa kane ka kam, da kaba pyntikna ba ki jingïada kiba kum kine la pynjlan ban ïada ïa ki hok jong ka jaidbynriew Khasi.”
