Shillong, Lber 31
U Nongïalam ka Liang Pyrshah ha Khasi Hills Autonomous District Council (KHADC) Bah Titosstarwell Chyne ha ka sngi Ba-ar u la pan jingshai halor ka jingsospon ïa u Secretary ka Council, ha ka jingïakynduh bad u Chief Executive Member (CEM) Bah Winston Tony Lyngdoh.
“Ngi la pan jingshai ha kaba ïadei bad ka jingsospon ïa u Secretary jong ka KHADC,” la ong u Bah Titos hadien ka jingïalang bad u CEM.
Katkum ka jingïathuh jong u CEM, ka jingsospon ka dei namar ka jingbym biang ha ka rukom treikam hapoh ka ophis, khamtam ha kaba ïadei bad ka jingïaid lait ïa ka Executive Committee ne Executive Member ba dei khmih ha kaba mynjur ïa ka affidavit ba dei ban file hapoh ka ïingbishar High Court.
“U CEM u la pynshai ba ka la don ka jingbym biang ha ka rukom treikam hapoh ka ophis ha kaba ïadei bad ka jingai jingmynjur ïa ka PIL.. ha kaba ki la shim ïa kane kum ka jingbakla kaba khia bha bad ban sospon artaiew ïa u Secretary,” la ong u Bah Titos. La khmih lynti ba u Secretary un treikam biang ha ophis naduh ka 2 tarik Ïaïong.
U Bah Titos u la ong ba ka liang pyrshah ka la pan jingshai ruh ba hato la don ka jingthung jingtohkit pyrshah ïa u Secretary. “La dep ban thung ïa ka jingtohkit bad la khlieh da ki ophisar jong ka Council ïa ka jingtohkit,” la ïathuh u CEM ha ka kynhun ki MDC liang pyrshah.
Ha kaba ïadei pat bad ka jingiehnoh kam jong u Standing Counsel ka KHADC, Bah TT Diengdoh uba long u Senior Advocate, u CEM u la ong ba kane ka dei halor ki daw shimet bad ka bym don jingïadei eiei bad ka jingshah sospon jong u Secretary.
“Ka jingiehnoh kam jong u standing counsel ka dei beit halor ki daw shimet jong u bad kam don jingïadei eiei bad ka jingshah sospon jong u Secretary,” la pynpaw u CEM ha ki dkhot ka liang pyrshah.
U Bah Titos u la pyntip ruh ba ha ka jaka jong u Bah TT Diengdoh, ka Executive Committee jong ka KHADC ka la thung da u bym dei u para jaidbynriew kum u Senior Counsel.
U Bah Titos u la ong, kaba kham pynsngewkhia ka dei ba la thung bujli da u bym dei na ki para jaidbynriew, bad CEM pynshai ba ka dei ba duna eh ki Khasi kum ki Senior Advocate.
