Mawkyrwat, Lber 31
Arngut ki samla kynthei na ka shnong Nonglang, South West Khasi Hills District kiba la jah na la ïing naduh ka step jong ka 30 tarik u Lber 2026 bad hadien arsngi ba la pyrshang ban wad, la lap noh ïa ki na ka krem Synrang Mawrin kaba don ha Mawten.
Kitei ki samla kynthei ba la jah la tip kyreng kum ka Fencyrose Marwein, 17 snem bad ka Sanihun Kharlyngdoh, 16 snem.
Katkum ka jingïathuh ki kmie jong kine ki arngut ka Kong Sisterlin Marwein bad ka Kong Sinora Kharlyngdoh, ki la ïathuh ba kine ki arngut ha ka sngi U Blei ka 29 tarik ki la leit jingiaseng ha Mawten bad ki la wanphai miet sha ïing ha kaba ki bahaïing ki la mai la shoh ïa ki, hynrei ha ka step kaba bud ka 30 tarik kine baroh arngut ki la phet noh na la ïing.
Ki kmie jong kitei ki arngut, ki la ïathuh ruh ba ki la pyrshang ban phone hynrei kim ïoh bad pyrshang ban wad ïa ki ha ryngkat ka jingïatreilang bad ki bor pulit hynrei kim shym la lap dien satia ïa ki bad dei tad ha ka janmiet jong ka 31 tarik ha ka por kumba 5 baje eiei ba ki bahaïing ki la lap noh ïa kine ki arngut na kawei ka krem ha Synrang Mawrin kaba don ha Mawten.
Shuh shuh ki tyllong khubor na ki pulit, ki la ïathuh ba hadien ba la lap, ïa kitei ki arngut la ïalam sha Civil Hospital Mawkyrwat ban leh ïa ka medical Check-up bad hadien ba lap ba ym don eiei la aiti noh ïa kine ki arngut sha kiba haïing hasem.
Kum ban shu kdew ha kaba ïadei bad kane ka jingjia, kiba haïing hasem ha ka 31 tarik u Lber 2026 ki la leit ban buh da ka ejahar ha thanad Mawkyrwat.
