Shillong, Lber 31
Ki kam tuh kam thiem ki dang ïai bteng na kawei ka sngi sha kawei pat bad ïa kane lah ban sakhi na ki jingjia shah tuh kiba dang shen na kylleng ki bynta jong ka sor Shillong bad na kiwei ki jaka ruh kumjuh.
Katkum ka khubor na ki pulit la ong ba ha ka 30 tarik mynta u bnai, ki runar bym lah ban ithuh ki la tuh ïa kawei ka arshaka kaba don ïa u registration number ML05-AF-3760 kaba dei jong u Elnathan Saithwai na ka jaka sah jong u, kaba don ha shnong Lyngkyrdem kaba hap hapoh ka thanad Pynursla ha East Khasi Hills.
Na ka liang jong u Rishab Jhunjhunwala ruh u la ai ka jingujor ba ha ka 29 tarik mynta u bnai, ki runar bym lah ban ithuh, ki la prong tuh hapoh ka ïingsah jong u, kaba don ha GS Road, Shillong bad ban rong tuh ïa ka pisa kaba long T.2 lak bad kawei ka pla kaba don ïa ki kot ki sla kiba donkam kynthup ka passport.
Ha kawei pat ka khubor, na ka liang jong ka Kong Wandashisha L Lyngkhoi ka la ai ka jingujor ba ha ka miet jong ka 27 tarik mynta u bnai, ki runar bym lah ban ithuh ki la tuh ïa ka arshaka jong ka, kaba don ïa u registration number ML05-AE-2921 na ka thaiñ Mawiong Umjapung, Nongneng-A, Shillong.
Kumjuh ruh na ka liang jong u Asad Ali u la ai ka jingujor ba ha ka 28 tarik mynta u bnai, ha ka por kumba 2.30 mynsngi, ki runar bym lah ban ithuh ki la tuh ïa ka arshaka ka jong u, kaba don ïa u registration number AS34-9356 na Mirjumla Majar Sharif ha South West Garo Hills.
