Shillong, Ïaïong 01
Ha ka sngi Ba-ar, la lap ïa ka metïap jong uwei u khynnah ba dang 16 snem ka rta, uba dei u khynnah skul ba pule klas X na ka jingkieng Umpling.
U SP ka East Khasi Hills u Bah Vivek Syiem u la ong, “Ïa une u khynnah la wanrah ïap ïa u sha Bethany Hospital, ha kaba la pynbna ba u la khlad noh. U la mih na ïing ha ka por 1:30 mynsngi bad ki kmie ki kpa jong u ki la ïoh pdiang ïa ka phone na ka phone jong u ha ka por 6 baje janmiet, ha kaba la ong ba u don ha jingkieng Umpling.”
U SP u la bynrap, “La lap ïa u khynnah ha ka jingbym tip briew bad mih snam na ka khmut. Ym don kano kano ka jingmynsaw ha ka met, lait noh tang ka jingmih snam na khmut bad ka jingkylla rong jong ki rmiang shyntur ba shalor. La pynkit noh ïa ka met ban leh post-mortem ha NEIGRIHMS ban pynthikna ïa ka daw jong ka jingïap.”
Ki jinglap ba nyngkong ki pyni ba ym shym la don kano kano ka jingshah thombor jong une u khynnah.
“Kumba ka paw, kam don satia kano kano ka jingpaw ba un shah shoh ne shah thombor,” la ong u Bah Vivek, hynrei ki dang ap pat ïa ka kaiphod kaba pura ban shai lut halor kane ka jingïap.
