Shillong, Ïaïong 03
Ka Ïingbishar ka la ai por 8 sngi ïa ki pulit ka East Khasi Hills District ban tohkit ïa u Kennedy Khongsit, 32 snem ka rta halor ka jingshah pynïap u heprit Kyrshanbor Kharmudai 7 snem ka rta na ka shnong Nongrah Lummyrboh.
Hashuwa kane ki pulit ka East Khasi Hills ki la rah ïa u Kennedy Khongsit sha Civil Hospital, Shillong ban leh eksamin hashuwa ban rah ïa u sha Ïingbishar.
La ïathuh ba ki pulit ki la pan por 12 sngi na ka Ïingbishar ban tohkit ïa u Kennedy hynrei ka Ïingbishar pat ka la ai por ban tohkit 8 sngi halor ka jingshah pynïap u heprit Kyrshanbor.
Lah ban kdew ba u heprit Kyrshanbor Kharmudai u la jah na la ïing ha ka janmiet jong ka 08 tarik u Risaw 2025 na Nongrah, Lummyrboh bad ha ka jingïawad shnong la lap noh ïa ka metïap jong u narud surok ka khlaw Mawpat.
Kane ka long hadien 6 bnai ba ki pulit ki la ïohkem ïa utei uba suba donkti ha kane ka kam pynïap ïa utei u heprit.
