Shillong, Ïaïong 03
U Bah Regeenal Shylla, dkhot ka Forum of Meghalaya Coal Organisation, u la pynpaw ba ka kyndon ba hap don jaka 100 hectare haba aplai ïa ka Prospecting License lane Mining Lease ban tih dewïong ha ka Jylla ka buh jingeh ïa ki paidbah.
Haba kren sha ki lad pathai khubor ha ka 02 tarik u Ïaïong, 2026, u Bah Regeenal u la ong ba u la dep phah ka jingthoh sha ka Sorkar Jylla halor ban pynhiar ïa ka jingheh ka jaka khnang ba ki riewlum kin ïoh ïa ka lad ban im ja na ka kam tih dewïong katkum ka jingstad saïan ba mynta.
Da kaba pyntip ba u la thep da ka Petition ha Meghalaya High Court halor kane, u Bah Regeenal u la ong ba bunsien u la ïakren halor kane bad ki bor Sorkar hynrei kam shym la mih soh satia haduh mynta.
Shuh shuh u la ong ba ka Sorkar Jylla bunsien ka kren ba yn weng noh ïa ka jingkhang tih dewïong bad wanrah ïa ka Scientific Mining hynrei ka long ka man pat ha ka jingshisha kam long kumta.
Ki kyndon ki trei tyngeh ïa ki nongtih bad khaïi dewïong kiba rit katba ki kyndon pat kim don satia, la ong u Bah Regeenal.
