Shillong, Ïaïong 03
Ka Hynñiewtrep Integrated Territorial Organisation (HITO) ka la leit ban buddien na ka ophis Meghalaya Energy Corporation Limited (MeECL) ba don ha Lumjingshai, Shillong haba ïadei ka jingpyndonkam ne Land Grabbing ka Riangdo Vineer Pvt. Ltd ïa ka jaka jong ka MeECL khlem da ïoh jingbit.
Ha kane ka jingleit ban buddien ïa kane ka kam na u Directorate of Corporate Affairs (DCA) ka MeECL la ïalam ïa ka kynhun da u Bah Balajied Jyrwa General Secretary jong ka HITO Shillong City Unit ha ka jingïadonlang ki dkhot ka HITO Shillong City.
Haba ai jingkren u Bah Balajied u la ong ba ki la ïoh ban ïakynduh ïa u Additional Secretary ban ïakren haba ïadei ka jingujor jong ka seng halor ka jingpyndonkam bakla bad tur tam pud ka Riangdo Vineer Pvt. Ltd ïa ka jaka jong ka MeECL, ha kaba na ka liang u Additional Secretary u la pynpaw ba kane ka kam ka dang don hapdeng ka jingbuddien bad kular ruh ba ha kine ki taïew ban wan kan pynlong ïa ka jingjurip.
U la pynpaw ba na ka liang ka tnad khlaw (Forest) ka la dep ban shimkhia ban pyntyllun ïa ka kam pyrshah ïa ka jingpynkheiñ kyndon ka Riangdo Vineer Pvt. Ltd ïa ki kyndon jong ka Industries Act bad pynpaw ba na ka liang ka HITO kan ïai-bteng ban buddien.
