Shillong, Ïaïong 03
U Myntri Bakhraw ka Raid Nongkrem u Hamsilet Mylliempdah, u myntri ba dei peit ïa ka Shnat Raid Tynring u la kynthoh ha kaba ïadei ba mih ka huri hura hapoh ka Shnat Raid Tynring ha kine ki khyndiat sngi.
Haba kren sha ki nongthoh khubor u Myntri Bakhraw Hamsilet ula kynnoh ba ka jingmih ka huri hura hapoh ka Shnat Raid Tynring ha kine ki khyndiat sngi ka dei na ka jingleh u Syiem ka Hima Khyrim kaba u ailad ban pynkylla ïa ka Dorbar Shnat Raid sha ka Dorbar tang jong ki 17 kur.
Shuh-shuh u Myntri Bakhraw Hamsilet u la ïathuh ba u la long kum u Myntri Bakhraw jong ka Raid Nongkrem la kumba 44 snem tam ïa kaba u la shimti ïa kane ka kam naduh 12 tarik u Rymphang u snem 1982 bad u la pynshai ba hapoh ka Hima Khyriem baroh ki don Hynriew tylli ki Raid bad Hynriew Lyngdoh, kata ka Raid Nongkrem, ka Raid Nongbri, ka Raid Mulieh, ka Raid Mushai, ka Raid Nongkynrih bad ka Raid Lawai, hynrei dei tang ka Raid Nongkrem kaba ïoh ïa ka kyrdan Bakhraw.
U la ïathuh ruh ba hapoh Shnat Raid Tynring ha ki por ba kham mynshuwa ïa ka jingjied bad ban pynskhem ïa u Sordar ka Raid la ju ïaid lyngba ki Bakhraw jong ka Raid Nongkrem, katba ha kane ka kynti la ïaidlait ïa kane.
U la ong ka jingjied Sordar ha Shnat Raid Tynring ka dei ban jied beit da ki nongshong shnong kynthei bad shynrang kiba la palat 18 snem, hynrei kaba sngew phylla ba ïa ka jingjied Sordar Shnat Raid Tynring la pynkylla ban jied tang da ki 17 kur ha kane ka kynti bad u la pynpaw ka jingpyrshah ba tang ki 17 kur ban ïoh jied Sordar.
Shuh-shuh u la ïathuh ba ïa kane ka kam, ka la don ruh ka jingïatai kaba la neh slem bha ba ym dei ban ïoh jied Sordar tang da ki 17 kur, hynrei namar ba u Syiem ka Hima Khyrim lem bad ki katto katne ki pdiang ban jied Sordar ka Shnat Raid tang ki 17 kur ki pynïaid beit ïa ka ilekshon ha u snem 2025.
U Myntri Bakhraw Hamsilet u la ïathuh ba shuwa ban wan ka ilekshon jied Sordar ha ka Shnat Raid Tynring ha u snem 2025, na ka liang jong ki Myntri Bakhraw ka Raid Nongkrem, ki la phah jingthoh sha ki kyrtong kiba ïakhun ha ka ilekshon Sordar ban pynsangeh shuwa ïa ka ilekshon kaba la jied tang da ki 17 kur namar ba kam dei katkum ka lynti kaba dei, hynrei kiba pynïaid ïa ka jingjied Sordar kim sngap bad ki pynïaid ïa ka jingjied Sordar tang da ki 17 kur.
Shuh-shuh ula kynnoh ba ki Myntri Bakhraw ka Raid Nongkrem ruh kim shym la pynïaid ïa ka ilekshon jied Sordar, hynrei la shu phah briew da u Syiem ka Hima Khyrim ban pynïaid ïa ka ilekshon jied Sordar.
U Myntri Bakhraw Hamsilet u la kynnoh ba ka jingmih ka huri-hura baroh ka dei namar ba u Syiem u la don lypa ka jingshah liang ha kaba kum ki Myntri Bakhraw ka Raid Nongkrem ki la pyrshah naduh kaba sdang ïa kane ka kam ban pynkylla Dorbar tang jong ki 17 kur ïa ka Dorbar Shnat Raid Tynring.
