Shillong, Ïaïong 03
Ka Confederation of Meghalaya Social Organizations (CoMSO) ka la sdang ïa ka jingïalap ban pan jingkyrshan na baroh 60 ngut ki nongthaw aiñ na ki seng saiñpyrthei bapher-bapher na ka bynta ban pyntreikam ïa ka Special Intensive Revision (SIR) jong ka thup kyrteng thep vote bad ka jingpynkylla ïa ka Riti Synshar (Scheduled Tribe order 1950) ha Meghalaya.
“Ngi la ai por 45 sngi ïa ka Sorkar Jylla ba kan shim ïa ki sienjam ban thoh sha ka tnad kampohïing jong ka Sorkar Pdeng, sha ka tnad ilekshon jong ka ri India, bad sha kiwei pat ki bor halor kine ki mat,” la ong u Chairman ka CoMSO u Bah Roykupar Synrem hadien ba u la ïakynduh ïa u President ka BJP ka Jylla u Rikman G Momin ha ka sngi Palei. U Bah Roykupar u la ban jur ïa ka jingdonkam ban ïatreilang bad baroh ki nongshim bynta, kynthup ïa ki seng saiñpyrthei.
“Ngin sa leit sha kawei pa kawei ka seng, ban ïakynduh markhmat ïa kine ban phah shithi, da kaba kyntu ban kyrshan ïa kine ki mat kiba kongsan kiba ktah ïa ki jaitbynriew trai ri trai muluk,” u la ong.
U la ïathuh ba ka BJP Meghalaya ka la pynthikna ïa ka CoMSO ba ki don ha kajuh ka jingmut ha kaba ïadei bad ka jingpyntreikam ïa ka SIR bad kin ïatreilang bad ki bor ba dei peit.
“Kin pule ïa ka jingbatai jong ngi bad kin shim ïa ki sienjam kiba donkam na ka bynta ka jingpynkylla ïa ka hukum ST,” la bynrap biang u Bah Roykupar.
Ka CoMSO ka la pdiang sngewbha ïa ka jingkren jong u Myntri Rangbah ka Jylla u Conrad K Sangma ban kyrshan ïa ka SIR hynrei ka la ban jur ïa ka jingdonkam ban shim ïa ki sienjam kiba shimkhia ban pyntreikam ïa ka. U la ong ba kam dei tang ki jingkren, hynrei ban pyndep ïa ki kam.
