Shillong, Ïaiong 03:
Ka Sorkar Jylla ka don ha ka lynti ban pyntreikam ïa ka rukom siew tulop kaba thymmai na ka bynta palat 23,000 ngut ki nonghikai skul SSA bad Adhoc naduh ka 1 tarik u bnai Jymmang, namar ki hap ban pynshisha ïa ki nonghikai ka la jan dep.
“Ngi thikna ba tang hapoh khyndiat sngi, ngin sa lah ban pyndep bad ha ka 1 tarik Jymmang, ngin sa lah ban siew ïa ka tulop thymmai”, la ong u Myntri ka tnad pule puthi u Bah Lahkmen Rymbui hadien ba u la pynïaid ïa ka jingïalang ban bishar bniah ha ka sngi Palei.
U la ïathuh ba ka kynhun myntri ka la mynjur ïa katei ka jingsiew tulop kaba thymmai hapoh ka jingïalam jong u Myntri Rangbah ka Jylla u Conrad Sangma.
U Bah Lahkmen u la kubur ba watla ka Sorkar ka la kyntiew kyrdan ïa ki katto katne ki Secondary School sha ka Higher Secondary School bad pynmih thymmai ïa ki “stream”, hynrei ka jingthung nonghikai ka dang shem jingeh hynrei ki dang thung pat kum ki nonghikai ba shipor (contract basis).
U Bah Lahkmen u la pynpaw ba ka Sorkar ka dang trei shitom ban weng ïa kane ka jingeh bad ka thmu ban thung da ki nonghikai ba pura hapoh kine ki khyndiat bnai ban wan.
“Ngi dang ïakren kumno ban ïohi ba ha kine ki khyndiat bnai ban wan ka post bad ki nonghikai ki dei ban don ha ka jaka jong ki,” u la bynrap.
Ki mat ba la ïakren ha kane ka jingïalang ki kynthup ïa ka tulop jong ki nonghikai kolej ba hikai shiteng por, ki jingtei na ka bynta ki kolej ba thymmai ha Mawphlang, Patharkhmah, bad Ronjeng bad ki kam jong ki skulbah.
Ka jingïalang ka la ïakren ruh ban pynbeit ryntih ïa ki skul, ha kaba ki Ophisar na ka tnad pule puthi jong ki Distrik ki la trei shitom ban weng ïa ki jingeh.
U Bah Rymbui u la ong, ka Sorkar hapoh ka jingïalam jong u Myntri Rangbah ka Jylla ka kwah ban pynbeit ïa baroh ki jingeh kiba don ha ka tnad pule puthi.
