Shillong, Ïaïong 03
Ki bahaïing hasem jong u Kyrshanbor Kharmudai ki la kynnoh ba u Kennedy Khongsit uba 32 snem ka rta um da pariah briew shuh naduh ba u la pynïap ïa u Kyrshanbor ha kine ki hynriew bnai ba la ïaid ka jingtohkit ki pulit.
Haba ki nongthoh khubor ki la ïoh ban ïakren bad ka hynmen arkmie u Kyrshanbor Kharmudai ka Balari-shisha Kharmudai ka la ïathuh ba u Kennedy u shait kren bha ïa ki briew hynrei mar shu dep pynïap ïa u Kyrshanbor u la long pher um da pariah briew shuh.
Ka la ïathuh ba u Kyrshanbor u shait leit peit TV ha ïing jong u Kennedy bad ki shait ïa rung ïa mih ha ïing jong ki.
Ka la pyntip ba u Kennedy u ju kren bha ïa ki briew hynrei naduh ba shah pynïap u Kyrshan-bor um da kren briew shuh.
“Ngi kyndit haba wan ïathuh ki paramarjan ba dei u Kennedy uba pynïap ïa u Kyrshan” la ong ka hynmen arkmie.
Na ka liang ka Kong Bobyna Dhar kaba dei ka President ka Seng Longkmie Dong Lummarboh ka la aikhublei ïa ki pulit kiba la trei shitom ban lap ïa uba donkti ban pynïap ïa une u heprit.
Ka la ïathuh ba kam don jingtip bha la une u Kennedy u leit wad lang ne em ha por bajah u heprit namar ki la ïa bunkam ban leit ai ejahar ha ki pulit ha Rynjah.
Kumban shu pynkynmaw, katkum ka jingphla u Kennedy ha ki pulit ba u sngewbitar ïa u Kyrshanbor namar um treh ban sait ïa ka top kumta u la set da ka kti ïa ka ktien bad u khmut ban thep hapoh top.
Ki pulit ki la ïathuh ba hadien ba la sei na ka top u la buh shadien ïing bad thep ha byrni ïa ka met ban rah da ka scooty jong u bahaïing ban leit bret sha khlaw Mawpat.
Kaba la pynkyndit pat ïa baroh ka jaidbynriew namar hadien hynriew bnai ba ki pulit ki la pynlong ka jingtohkit ki la lap ba uba pynïap ïa u Kyrshanbor Kharmudai u dei u marjan ïing.
