Shillong, Ïaïong 03
Ka Dorbar Shnong Mawshbuit ka pynpaw ka jingsngewkhia haba ïadei ka surok ba 600 meter bad kaba ki shipai ki la kam mynta la katto katne bnai ba ka dei ka jong ki, haba ïadei kane ka Dorbar Shnong ha ryngkat u MLA ka Maw-ryngkneng Constituency ki la leit ban ïakynduh ïa u Station Commander ka 101 Area bad ïa ka Deputy Commissioner ka East Khasi Hills.
Kane ka jingleit kynduh jong ki ïa u Brigadier Rajesh Verma Station Commander ka 101 Area bad ïa ka Deputy Commissioner ka East Khasi Hills, Ka Kong R.M Kurbah ki long hadien ba ki shipai ki la sdang ban tuklar biang ïa ki kam khappud ha ka khyrdop shipai ban rung sha ka shnong Maw -shbuit ïa kaba la ïadonlang u Bah Heaving Stone Kharpran, MLA Mawryngkneng, u Bah E. Nongdhar, Rangbah Shnong Mawshbuit u Bah E. Kharkongor, Rangbah dong, ki Engineer, u SDO bad katto katne ngut ki nongkitkam shnong.
Haba kren hadien ka jingïakynduh u Rangbah Shnong u Bah E. Nongdhar u la ïathuh ba, u Station Commander 101 Area u la pyntip ba kane ka kam ka don hapdeng ka jingpeit jong ka Revenue Department namar ba ka la don ka Survey ba ka tnad Revenue ka wan ban leh ïa ka jaka shipai baroh.
Nalor kata u la ïathuh ruh ba ka jingleit ban ïakynduh ïa ka Deputy Commissioner ka dei ban ïoh jingshai shuh-shuh haba ïadei kane ka kaiphod, ha kaba ka Kong R.M Kurbah ruh kam pat lah ban ai kano-kano ka jingpynshai namar ba ka dang ap ïa ka kaiphod na ka tnad Revenue
Shuh-shuh u la ong ba ka Shnong ka kwah ba ki shipai kin pynkynriah ïa ka khyrdop na ka jaka ba ka don mynta ban pynkynriah beit sha ka jaka jong ki bad ka ban ker sainar na baroh arliang, khnang ba kan ym don shuh kano-kano ka jingwit hadien habud bad ka shnong ka kwah eh ka long tang ïa ka surok ba kan dei ka surok paidbah khnang ba ki nongshong shnong kin ïoh laitluid.
U Bah Heaving Stone Kharpran haba kren ha ki nongthoh khubor u la ong ba haba ïadei kane ka mat u la kren haduh laisien laiwat hapoh jong ka ïingdorbar thawaiñ, “Mynne u la pyni ïa ki map nadong shadong, hynrei u la pyni ïa ki jaka jong u kaba kynthup lang ruh ïa ka surok, ha ka jingshisha ka shnong ka don shuwa ka jingwan jong ki shipai bad ka surok ruh ka la don shuwa ka jingwan ki shipai, hynrei kumno u lah ban pynpaw ba kane ka 600 meter ka dei ka jong u” la ong u Bah Kharpran.
U la pynpaw ïa ka jingbymhun haba ïadei bad kane da kaba ong ba u shipai u lah ban ker sainar ïa ki jaka lajong, hynrei ïa ka surok ym dei ban kam namar ka dei ka jaka jong ki paidbah, “Ngim dei ban ailad ban long trai ki shipai ïa ka surok kaba 600 meter, u ïaleh ban kam hynrei ngin ïaleh khlem shongthait ban ïoh ïa ka jingshai,” u la ong.
