Shillong, Ïaïong 03
Ka Election Committee jong ka Khasi Students’ Union ka pyntip ba ha ka ilekshon ba XVI (Khathynriew) jong ka samoi treikam 2026-29 ka ban sa long ha ka 9 tarik u Jymmang 2026 yn pynthymmai lut ïa baroh ki nongïalam.
Ha kane ka ilekshon jied ïa ki nongïalam jong ka Khasi Students’ Union yn pynlong ïa ka jingjied naduh ka kam President, Vice President, General Secretary, Assistant General Secretary, Organising Secretary, Education Secretary, Information & Publicity Secretary, Sports & Cultural Secretary, Environment Secretary bad Office Secretary, ong ka kyrwoh khubor u Bah Samuel B Jyrwa Secretary ka Election Committee ka KSU.
Shuh-shuh ka Election Committee ka la bthah ïa baroh ki tnad treikam jong ka KSU ban ym pynthymmai nongkitkam lane pynkha tnad treikam thymmai tad haduh da la dep ka ilekshon jong ka seng kmie.
“Ka Election Committee ka la pynkut noh ïa ka CEC 2023-2026 bad ha ka jaka jong ka la thung da ka ‘Caretaker Body’ ha kaba ki dkhot ka CEC hi kin long ki dkhot kane ka ‘Caretaker Body’. U President bad u General Secretary ka CEC 2023-2026 kin long ki Caretaker President bad Caretaker General Secretary.”
Sa shisien pat ka Election Committee ka pynkynmaw ba ki kot thep kyrteng (nomination forms) na ka bynta ka election Central Executive Council jong ka samoi treikam 2026-2029 kin don ha ophis treikam ka KSU naduh ka 4 tarik u Ïaiong 2026.
Shuh-shuh la pynkynmaw ba ka tarik ba khatduh ban sam ïa ki kot ki sla thep kyrteng kan dei 13 tarik u Ïaiong 2026, ka tarik ba khatduh ban weng ïa la ki kot ki sla thep kyrteng kan dei 14 tarik u Ïaiong 2026 bad ka jingbishar lane ‘scrutiny’ ïa ki kyrtong bad ki kot ki sla thep kyrteng kan long ha ka 15 tarik u Ïaiong 2026 naduh ka por 1 baje nohphai sngi.
