Shillong, Ïaïong 03
Hadien ka jingpynpaw jingsngewkhia ki MDC ka Liang Pyrshah ha Khasi Hills Autonomous District Council (KHADC) ba ka Executive Committee ba mynta ba lam khmat da ka Voice of the People Party (VPP) ka thung da u bym dei u para jaidbynriew kum u Special Counsel, u Bah Winston Tony Lyngdoh, Chief Executive Member (CEM) u la ong ha ka jingïalang bad ki ha ka 31 tarik u Lber, 2026 ka jingïakren ka la long kaba sngewtynnad bha.
Haba kren sha ki lad pathai khubor ha ka 02 tarik u Ïaïong, 2026, u Bah Winston u la ong ba hadien katei ka jingïalang ki mih ban kren da kumwei pat.
U la ong ba ki MDC Liang Pyrshah ki thmu ban lehkai ïohnong saiñ-hima da kaba kren kumtei hynrei ki la dei ban sngewthuh ha ka por ba ïalam ma ki ïa ka Executive Committee mynshuwa pat ki thung katba mon.
Da kaba pynshai ba ka jingthung ïa u HL Shangreiso, Senior Advocate kum u Special Counsel ban mihkhmat ïa ki katto-katne ki mukotduma, u Bah Winston u la ong ba ki don ruh ki nongsaid aiñ kiba dei ki para jaidbynriew kiba ka Council ka la thung bad ka dang wad shuh-shuh ïa kiba tbit.
Halor ka jingthaw ïa ka Committee ban ïakren ïa ka Rule 128 ha kaba la ong ban pynrung lang ïa ki MDC ka Liang Pyrshah, u la ong ba ka buh jingartatien ban ïatreilang namar tang san minit ba ki mih na kamra ki la kren da khongpong.
