Shillong, Ïaïong 06
Uwei u heprit u ba ñiah saikil ha surok Shillong-Guwahati u la duh noh la ka jong ka jingim hadien ba u la leit ban tynrah nadien jong kawei ka kali TaTa pickup kaba kit ‘pipe’ bad kaba don ïa u Registration Number ML 05 AA 9263.
Kane ka jingjia aksiden ka dei kaba ka jia ha ka por 5 baje eiei janmiet jong ka lah sngi u Blei hajan jong ka Mahari & Son Petrol Pump kaba don ha Jaïaw Langsning Shillong.
Katkum ka jingïoh jingtip une u heprit u dei u ba shong ba sah ha Dymmiew Mawprem bad uba dang hapoh ka rta ba 12 snem eiei, kiba ïohi ïa kane ka jingjia ki ïathuh ba une u heprit u la ñiah ïa ka saikil ka bym don ‘brake’ bad wan na kajuh ka phang ba wan katei ka TaTa pickup bad haba katei ka TaTa pickup ka thmu ban rung ha Mahari & Son Petrol Pump, katei ka saikil ba u ñiah ka la leit tynrah nadien bad leit rung sha khrum jong katei ka kali.
Ki pulit ki la wanpoi ha katei ka jingjia bad la pynkit ïa utei u khynnah sha Robert Hospital Shillong ban ïoh ïa ka jingsumar, hynrei ki bor pynïaid hospital ki la pyntip ba utei u khynnah u la khlad lypa shuwa ban poi ha hospital.
