Shillong, Ïaïong 06
U MLA ka Nongpoh Constituency u Bah Mayralborn Syiem u la pynpaw ïa ka jingsngewkhia ïa ka jingkynduh jingeh jong ki nongrep ka thaiñ Ri-Bhoi na ka jingshah lynshop ha ki bor Mariang bad kyntu ïa ka Sorkar Jylla ban pynbeit bad ban pynkloi ïa ki lad jingïarap.
Ha ka sngi Nyngkong u MLA ka thaiñ ha ryngkat ka synjuk jong ki rangbah shnong kiba hap hapoh ka Umling C&RD Block ki la leit ban aiti da ka jingthoh sha u Myntri ba dei peit ïa ka tnad Revenue & Disaster Management u Ban Lahkmen Rymbui ban pynpaw ïa ki jingïakynduh jingeh jong ki nongrep.
Haba kren sha ki nongthoh khubor u Bah Mayralborn u la ïathuh ba nalor ka jingeh jong ki nongrep u la ïoh ruh ban ïakren haba ïadei ki longïing kiba shah ktah ha ka jingwan lynshop ka bor Mariang ha u bnai ba la dep.
U Bah Mayralborn u la kyrpad ïa ka Sorkar Jylla lyngba u Myntri bad ka tnad Revenue & Disaster Management ban pynkloi ban pyllait ïa ka pisa sha ka District Disaster Management Authority, khnang ba ki bor district kin ïoh ban pyllait kloi ïa ka pisa sha ki nongrep kiba shah ktah ha ka jinglynshop ki bor mariang.
“Kane kan pynlah ban sam mardor ïa ki tiar jingïarap kiba donkam sha ki longïing bad ki nongrep kiba shah ktah,” u la ong.
Shuh-shuh u la ban jur ïa ka Sorkar Jylla ban pynïoh mar-mar ïa ki lad jingïarap sha ki longïing kiba mad ha ka jingshah lit ki tnum ïing, “Baroh shi katta ki nongshong shnong ki ïoh ïa ki lad jingïarap na ka Sorkar, hynrei ban kham pynkloi shuh-shuh katba lah” u la ong.
Haba bynrap u la ong ba katkum ka jingïoh lum jingtip ki don palat 240 tylli ki shnong kiba mad ïa ka jingshah ktah ha ka jinglynshop ka bor mariang ha baroh kawei ka Ri-Bhoi District bad u la pynpaw ka jingai khublei ïa u Myntri ka tnat halor ka jingmynjur bad ka jingkular jong u ban pynthikna ba ki longïing bad ki nongrep kiba shah ktah kin ïoh kloi ïa ka bai lutksan.
