Shillong, Ïaïong 06
Ka Hynñiewttep Youth Council (HYC) Education Cell hapoh ka jingïalam u Samla Enlang Sawian, Education Secretary ha ka 06 tarik u Ïaïong 2026, ki la leit ban buh da ka jingthoh sha u Myntri ba khmih ïa ka pule puthi, u Bah Lahkmen Rymbui bad sha u Myntri Rangbah u Conrad K Sangma ban pynpaw ka jingpyrshah haba ïadei bad ka jingthmu ka Sorkar ban pynkiew ïa ka bai skul ha ki Kolej Sorkar.
Haba kren sha ki lad pathai khubor u Samla Enlang Sawian u la ong ba ka jingwanrah ka Sorkar ïa kane ka polisi kan wanrah jingeh ïa ki khynnah pule kiba wan na ki longïing kiba duk ba duna ha ka ïoh ka kot.
U la pynpaw ruh ïa ka jingbynñiaw namar ba ka Scholarship ruh ka slem bha ban ïoh bad ka shem jingeh lada slem ban ai ïa kane ka jingmyntoi sha ki khynnah pule.
Da kaba kdew ruh ba lada pyntreikam ïa kane ka polisi ban pynkiew ïa ka bai skul ha ki Kolej Sorkar kan sa ktah shibun.
“Ngi dawa ba u Myntri ba khmih ïa ka pule puthi bad u Myntri Rangbah kim dei ban pynïaid ïa kane ka polisi. Lada ka Sorkar ka ïaid shakhmat ban pyntreikam ïa kane ka polisi ka seng kan sa shim da kiwei pat ki sienjam ba tyngeh,” u la ong.
Haba bynrap na ka liang u Pynskhem Kharjahrin, Joint Secretary u la ong ba lada ka Sorkar ka leh bha ïa ki khynnah ka dei ban wanrah ïa ka polisi kaba lah ban ïarap hynrei kane ka jingleh ka Sorkar ban wanrah ïa kane ka polisi pynkiew ka bai skul kan ktah bha bad kan wanrah ïa ka jingeh bad pynhiar shuh-shuh ïa ki khynnah skul.
U la ong ruh ba kiba bun dei ki khynnah kiba duk ba suk, kane kan ktah ïa ki khynnah pule bad kaba ma shuh shuh ka long ba kan sa wanrah sa ka jingsniew namar lada jia ba ki khynnah kim leit skul shuh kin sa leh ïa ki kam ki bym lah ban pdiang ha ka imlang ka sahlang, kumba ka paw ha kine ki sngi ba mynta.
