Shillong, Ïaïong 06
Ka ïingbishar kala rai pynrem ïa u Deepak Thapa ba leh beijot ïa la ka khun rit ha u snem 2022 bad la rai set phatok ïa u haduh 25 snem kum ka jingpynsaja.
Ha ka kyrwoh kaba la phah da u Superintendent of Police, East Khasi Hills u Bah Vivek Syiem ha ka sngi Nyngkong u la pyntip ba ïa ka ejahar la ujor ha thanad Rynjah ha ka 5 tarik u Risaw, 2022, kaba la kynnoh ba u Thapa u la leh be-ijot bad pynngat ïa u hapoh ki kyndon ka POCSO Act.
Ïa kane ka jingjia la tohkit, la aiti ïa ka charge sheet bad la set ha phatok hapoh ka Judicial Custody haduh 3 snem, 5 bnai bad 26 sngi katba u dang don hapdeng ka jingshah tian bishar.
Ha ka 1 tarik u Ïaïong, 2026, ka Special POCSO Judge R Rymbai kala tian bishar bad shim ïa ka rai ban pynrem ïa u Thapa ha kaba ïadei bad ka Special POCSO Case No. 68 jong u snem 2022. La pynrem ïa u ban shong phatok sa 21 snem, 6 bnai bad 4 sngi kaba long baroh 25 snem ha phatok bad ban shah set phatok biang sa 3 bnai lada jia ba um siew ïa ka kuna.
