Shillong, Ïaïong 08
Ki bor distrik ka East Khasi Hills ki la bthah ïa baroh ki tnad treikam ba kin shim ïa ki lad jingpynkhreh hashuwa ban wan ka aïom slap kum ka kam kaba hakhmat eh ban pyntikna ïa ka jingïatreilang kaba paka lada jia ba wan ki jinglynshop ha ka aïom slap mynta u snem.
Ïa katei ka jingbthah la pynmih ha ka jingïalang ka District Coordination jong ka Incident Response Team (IRT) kaba la long ha Conference Hall jong ka ophis ka Deputy Commissioner, East Khasi Hills District ha ka Sngi Balang.
Ïa kane ka jingïalang la pynïaid da ka Deputy Commissioner bad Chairperson (DDMA), Kong R.M. Kurbah bad la ïashim bynta lang da u Additional Deputy Commissioner bad CEO (DDMA), Bah S. Warjri ha ryngkat ki ophisar na ki tnad treikam bapher-bapher, ki Block Development Officer, ki Sub Divisional Officer (C), bad ki nongmihkhmat na ki tnad shipai bad Paramilitary.
La khot ïa kane ka jingïalang ban khmih bniah ïa ki lad jingpynkhreh jong baroh ki tnad treikam hashuwa ka jingwan jong u slap.
Ha kane ka jingïalang, la rai ba baroh ki tnad treikam kin shim ïa ki lad jingpynkhreh hashuwa ka jingwan u slap kum ka kam kaba hakhmat eh.
Kine ki kynthup ïa ka jingjurip ïa ki jaka ba lah ban shlei um bad twa khyndew, kumjuh ka jingpeit bniah ïa ki dieng kiba lah ban shah ktah bad ki sainar bording kiba lah ban khyllem ne buh jingma ha ka por ba jur lyer bad jur slap.
Na ka liang ka Deputy Commissioner ka la ban jur halor ka jingdonkam ban pynlong ïa ki ‘Mock Exercise’ na ka por sha ka por ha kylleng ki ophis Sorkar ban pynkhlaiñ ïa ki lad jingïarap ba kyrkieh.
Ha kajuh ka por, la kdew ruh halor ki ‘Fire Safety Audit’ jong ki ïingmala kum ka bynta kaba kongsan jong ka jingpynkhreh, ha kaba la bthah ïa baroh ki tnad treikam ban pynthymmai bad buh ïa ka jinglum thup jong ki jingdon-jingem kiba don na ka bynta ka jingpynkhreh bad jingïarap ba kyrkieh kaba ïaid-beit ïaid-ryntih.
Shuh shuh ka Chairperson ka la kyntu ïa baroh ki ophisar Sorkar ba kin long kiba peitngor bad pyntikna ïa ka jingtreikam kaba kloi bad shimkhia haba don kano-kano ka jingjia lynshop.
Ka jingïalang ka la kut da kaba pynskhem biang ïa ka jingkular jong ki bor distrik ban ïada ïa ki jingim bad ki jingdon-jingem lyngba ka jingthmu kaba ïapyrkhat lang bad ka jingïatreilang hapdeng ki tnad treikam bapher-bapher.
Lada jia ba don kano-kano ka jinglynshop, ki paidbah ki lah ban ‘phone’ ha u nombor 112 ban ïoh ïa ka jingïarap ba kyrkieh.
