Shillong, Ïaïong 09
Katba ki nongïalam ka Green-Tech Foundation (GTF) ki dang don hapdeng ka jingshah bat ki pulit, la lah ban sakhi ïa ka jingwan ban ai jingkyrshan da ki nongïalam ka Hynñiewtrep Integrated Territorial Organisation (HITO) ha ryngkat ka jingïadonlang ki nongïalam ka VPP Youth Wing kiba la ïeng hakhmat ka khyrdop ka Sadar Police Station, Shillong ha ka 09 tarik u Ïaïong 2026.
Haba kren sha ki lad pathai khubor u Bah Donbok Dkhar, President ka HITO, u la ther tyngeh da kaba ong ba don ki briew ha ka Jylla kiba leh politik ba ki briew nabar ki sa ïoh ban shna ïa ki hotel ha ka Jylla.
“Halor kane ka jingïakhih ka Green-Tech Foundation kum ka seng ngi la dep ban buh da ka jingthoh ha u Myntri Rangbah ka Jylla u Conrad K Sangma, ban dawa weng ïa ka jingthmu shna hotel ha Umïam,” la ong u Bah Donbok.
U la ong ba ka seng ka pynpaw ïa ka jingpyrshah halor ka jingthmu ka Sorkar Jylla bad kan ai ka jingkyrshan ïa ka GTF halor kane ka jingïakhih jong ki.
“Ka jingdon jong ki hotel baheh kam pynmyntoi ïa ka Jylla namar ba ïa ki la pynïaid da ki nongwei bad ka pisa kaba mih ruh ka poi lut sha ka Jylla Assam,” la ong u Bah Donbok.
Nalor kata, u la ong ruh ba ki party riewlum kiba ïa don lang ha ka Sorkar kim kheiñ snep bad kumta ki paidbah ki dei ban kyndit noh namar ba kine ki nang tang ban pynbiej ha ka por ilekshon ym ban peit ïa ka bha ka miat bad ban ïada ïa ka khyndew ka shyiap.
