Shillong, Ïaïong 09
Ka Sorkar Jylla ka la pynkhreh ban pyllait noh ïa ki ‘bill’ kiba dang sahteng kiba shongdor palat 900 klur tyngka sha ki kontraktor kiba pyntrei ïa ka Jal Jeevan Mission (JJM) ha kane ka Jylla.
Haba ïakren bad u Myntri ka koit ka khiah u Marcuise N Marak u la ong, ki bill ba dang sahteng jong ki kontraktor kiba pyntrei ïa ka JJM ki long palat 900 klur tyngka, hynrei ka rukom siew kan sdang shen bha hadien ba la dep pyndep ïa ki jingdonkam.
“Ngi la ïasoi ïa ka MoU ban pyntreikam ïa ka JJM 2.0 bad baroh ki projek kiba la pyndep 75 haduh 100 percent yn ai jingsiew ynda la dep ïa ka rukom treikam jong ka ophis,” la ong u Marcuise.
U Myntri u la pynshai ba ka jingpynslem ban siew ka dei namar ki rukom treikam ba la bthah da ka tnad Jal Shakti jong ka Sorkar India, kynthup ïa ka jingpynbeit ïa ka jingpynlut bad ka jingthaw ïa ka Sujal Gaon ID na ka bynta kawei pa kawei ka projek.
Haba kylli halor ki jingkynnoh ba la buh ïa ki pipe hynrei ym don um, u Marcuise u la pynpaw namar ki don ki jingeh ha ki tyllong um haba ka jingshna kam pat dei hynrei u la pynthikna ba ka Sorkar kan pyndep beit ïa kaei kaba la buh.
U la ong ba ka JJM 2.0 ka dei ka jingbuh thong ban dang ïai bteng, ïa ka jingtreikam bad jingsumar, bad ka jingneh jong ki projek, kumba la buh da ka Sorkar India.
