Mawkyrwat, Ïaïong 10
Uwei u rangbah u la shah kem noh ha ki pulit hadien ba la kynnoh ba lap ba u donkti ban leh be-i-jot ïa iwei i heprit ba dang 3 snem hynriew bnai ha South West Khasi Hills District.
Katkum ki tyllong khubor na u Superintendent of Police ka South West Khasi Hills District, Bah B. Jyrwa, u la ïathuh ba ha ka 13 tarik u Risaw, 2014 ki pulit ki la ïoh pdiang ïa ka FIR ha Mawkyrwat thanad ha kaba la pynpaw ba iwei i heprit iba dang rit ka rta i la shah leh be-i-jot ha u briew u bym lah ban tip bad ïa itei i heprit la hap ban phah noh sha Shillong namar ka jingshitom kaba jur.
Ha kaba ïadei bad katei ka jingjia, ka mukotduma ka la kut noh katkum ka kaiphod ba khatduh namar ba ym shym la don kano-kano ka jingtip ha kaba ïadei bad u briew uba leh ïa katei ka kam sniew.
Hynrei dang shen, ha kine ki khyndiat sngi, katei ka khynnah ryngkat ka jingkyrshan jong ka kmie bad ki bahaïing hasem, ka la wan shakhmat bad pynpaw ba ka lah ban ithuh ïa utei u nongleh kam sniew ha kaba ki pulit ki la kyrpad ïa ka Kashari badonburom jong u Special Judge (POCSO) Mawkyrwat ban pynkhie im biang ïa kane ka mukotduma ha kaba ka Kashari ruh ka la shah.
Hadien ba la shim ïa ka jingphla jong katei ka khynnah ryngkat ki sakhi, ïa utei u runar la kem noh la kem mynta ka sngi.
