Shillong, Ïaïong 13
Ka Khyndailad Tourist Taxi Association (KTTA) ha ka janmiet jong ka sngi Nyngkong ka la wan ban ai ka jingkyrshan ïa u Bah HB Nonglang, Chairman ka GTF uba la shongshah thngan ha madan Malki ban dawa na ka Sorkar Jylla ba dei ban wengnoh ïa ka projek ha Dewlynnong Lumpongdeng.
Haba kren sha ki lad pathai khubor u Bah Gedeon Rani, Chairman ka seng u la ong ba 300 klur ka Sorkar ka thmu ban die lilam ïa u Dewlynnong Lumpongdeng, balei pat kam pynkhie im biang ïa ka MCCL ha Sohra kaba ki briew kiba bun ki la duh kam lut ha kitei ki jaka.
U la ong ba ka roi ka par jong ka Sorkar ka long tang ban die lilam ïa ki jaka ki puta, “Ngin nym shah da lei-lei ruh ïa ka jingleh ka Sorkar.”
Kumta u la ong ba ka seng ka ai ka jingkyrshan ba pura ïa ka jingïakhih ka GTF.
“Katba ngi dang lah ban ring bad pynhiar mynsiem ngin nym shah da lei lei ruh bad ngin pyrshah halor kane ka jingleh ka Sorkar,” u la bynrap.
Kumta ka seng ka la kyntu ïa ki nongïalam ka GTF ba kan nym kynran dien watla ka Sorkar kam pat jubab haduh mynta, hynrei kan dawa beit haduh ban da jop.
