Shillong, Ïaïong 13
Ki katto katne ngut ki MLA jong ka United Democratic Party (UDP) ki la ai jingmut ba ka seng ka dei ban nym ïakhun ïa ka ilekshon MP shiteng samoi ha Shillong Lok Sabha, kaba la donkam ban pynlong hadien ka jingkhlad noh jong u MP ka VPP u Dr Ricky AJ Syngkon ha ka 19 tarik u Rymphang.
Uwei na ki MLA, uba khlem kwah ban pynpaw kyrteng, u la ong, “Ngi lah ban ai jingmut ïa ka seng ba kan nym pynïeng kyrtong na ka bynta ka ilekshon MP shiteng samoi jong ka Shillong Lok Sabha ka ban wan. Ka UDP ka dei ban pynleit jingmut ha ka jingpynkhreh na ka bynta ka ilekshon sha ka ïingdorbar thawaiñ jong u snem 2028.”
Kane ka jingai jingmut ka long hadien ka jingbym lah ban leh bha jong ka UDP ha ka ilekshon Lok Sabha 2024, ha kaba u kyrtong ka UDP u Bah Robertjune Kharjahrin u la ïoh tang 44,563 vote bad u la wan ha ka kyrdan kaba saw.
Shwa ïa kane, uwei na ki nongïalam ba rangbah ka seng u la pynpaw ba ka UDP ka dang pynlong ïa ka jingwad bniah ban lum ïa ki jingmut na ki konstitwensi kiba don ha Khasi bad Jaiñtia Hills.
“Ka rai kan long beit katkum ka jinglap na ka kaiphod jong ka jingwad bniah. Shen ngin sa shong ban rai la ngin pynïeng kyrtong ne em,” u la ong.
U Dr Ricky AJ Syngkon (bam kwai ha dwar U Blei) u la jop ha ka ilekshon MP kaba la dep da kaba ïoh 5,71,078 vote.
Ka ilekshon shiteng samoi ka long kaba la ap khmih lynti, ha kaba la khmih lynti ba ki seng saiñpyrthei bapher bapher kin mih shakhmat ban ïakhun.
Lah ban pynkynmaw ba u Bah Vincent H Pala jong ka Congress u la ïoh 1,99,168 vote, ka Dr Ampareen Lyngdoh na ka National People’s Party ka la ïoh 1,86,488 vote, u Prof Lakhon Kma u kyrtong shimet u la ioh 18,582 vote bad u Peter Challam kyrtong shimet u la ïoh 7024 vote.
