Shillong, Ïaïong 13
Ka Meghalaya Pradesh Youth Congress (MPYC) ha ka nohphai sngi jong ka 13 tarik u Ïaïong 2026, ka la wan ban ai ka jingkyrshan ïa u Bah H Bansiewdor Nonglang, Chairman ka GTF uba la shongshah thngan khlem buh por ha madan Malki ban dawa na ka Sorkar Jylla ban wengnoh mardor ïa ka projek ha Dewlynnong Lumpongdeng.
Haba kren sha ki lad pathai khubor u Samla Norbert Jana Nongbet, General Secretary MPYC u la ong ba “Kum ka seng ngi don ka jingsngewkhia kaba jur halor kane ka jingïakhih jong ka kynhun GTF bad ka jingshah thngan u Bah H Bansiewdor Nonglang kaba la dap mynta la 5 sngi lynter.”
“Ngi sngewkhia namar mynta ka la ïaid la 5 sngi lynter ka jingshong shah thngan u Bah H Bansiewdor Nonglang bad tang ban ïaid ruh um lah shuh, hynrei ngi ïohi ba ka Sorkar ka dangsngap mynthi haduh mynta,” u la ong.
Shuh shuh u la ïathuh ba ka Jylla ka la don lypa ïa 2 tylli ki 5 Star Hotel bad sa katno pat ka Sorkar ka dangkwah nalor ba ka Jylla ka dei kaba rit. “Hooid ngi sngewthuh ba ka Sorkar ka kwah ban pynroi ïa ka Jylla hynrei ka dei ban shim da ki lynti kiba dei, khnang ba ki nongshong shnong kin nym shah ktah,” u la bynrap.
Na ka liang u Samla Freddy Thabah, Mawlai General Secretary Block Congress u la ong “Ngim lah ban len ba ka jingsngap mynthi ka Sorkar dei ba ka ibeiñ bad bym kheiñ kor ïa ka jingïakhih bad jingdawa jong ka GTF.”
Nalorkata, u la kren da kaba shai ba lada ka Sorkar kan dangsngap mynthi halor kane ka jingdawa jong ka GTF, ka MPYC kam wan tang ban ai ka jingkyrshan hynrei kan sa shongïakhih lang ha madan Malki.
