Nongpoh, Ïaïong 13
U MLA barim u Esmatur Mominin uba la phet rieh mynta la kumba katto katne taïew hadien ka jingjia kynad kaba jur ha Rilum Garo halor ka jingpyrshah ïa ka jingïohlad ki bar jylla ban ïashim bynta ha ka ilekshon GHADC, u la wan pyndem noh ïalade hakhmat jong ki pulit ka Ri Bhoi District.
Katkum ka tyllong khubor ba la ïoh lum, la ïathuh ba utei u MLA barim jong ka Phulbari u la wan ban pyndem noh ïalade hakhmat ki pulit ka thanad Nongpoh ha ka sngi Nyngkong.
Kumban shu pynkynmaw biang, ha ka 9 tarik jong u Lber 2026, u Esmatur u la pyrshang ban leit thep kyrteng ïalade ha ophis u DC Tura na ka bynta ban ïakhun ïa ka ilekshon GHADC kaba la mih ka jingpyrshah kaba jur na ki paidbah nongshong ka Rilum Garo.
Shi sngi hadien katei ka jingthep kyrteng, kata ha ka 10 tarik jong u bnai Lber, 2026, utei u MLA barim, u ka kren ruh ïa ki kyntien kiba pynshit jaidbynriew haduh ba la mih ka huri hura kaba jur kat haduh ba la hap ban pynsangeh noh shwa ïa ka ilekshon GHADC.
Ka khubor pulit ka pynthikna ba u Mominin u la phetrieh ban lait na ka jingshah kem naduh katei hi ka por ba mih ki jingkulmar ha Rilum Garo.
Haba pyrshang ban wad jingtip, na ka liang ki pulit ka Ri Bhoi kim pat kwah ban kren eiei halor katei ka jingwan pyndem utei u MLA barim na Rilum Garo naba ka jingtohkit ka dang ïaid shakhmat.
