Shillong, Ïaïong 13
Ha ka jingïakhih da kaba shong shah thngan kaba khlem buh por jong u Bah H Bansiewdor Nonglang, Chairman ka Green-Tech Foundation, la lah ban sakhi ïa ka jingwan ai jingkyrshan u Dr.Batskhem Myrboh, kyrtong ka Voice of the People Party (VPP) ban ïa ai reng ha ka ilekshon MP shiteng samoi na Shillong Parliamentary Konstitwensi.
Haba kren sha ki lad pathai khubor, u Dr.Batskhem u la kynnoh ba ka jingbym khot ka Sorkar Jylla ïa ka GTF ban ïakren halor ka jingdawa, ka dei namar ba ka pynthud ïa ka tyllong treikam jong ka.
U la ong ba ka VPP ka pynpaw ïa ka jingai jingkyrshan kaba jur halor kane ka jingïakhih ka GTF kaba ïahap bad ka rukom treikam jong ka party haba ïadei bad ka mariang.
U la pynkynmaw ba ha ka por ba dang don u (L) Dr. Ricky AJ Syngkon, u la kren halor kane ka mat ba ym lah ban ïapeiñ ïa ka mariang bad kaba lah ban ktah ïa ka lawei jong ki pateng ban wan.
“Haba ka Sorkar ka thmu ban wanrah ïa ka roi ka par ha ka Jylla ka dei ban pyrkhat shuwa ïa ka rukom pynneh pynsah ïa ka mariang. Ka Sorkar haba ka shim ïa kano-kano ka sienjam ka dei ban khmih bniah khnang ba kan ai ka jingmyntoi ïa ki paidbah,” la ong u Dr.Batskhem.
Namarkata, u ong ba kane ka rukom treikam jong ka Sorkar MDA, kaba sngewsih ka long ba ka rukom treikam kam wanrah ïa ka jingmyntoi sha ki paidbah. “Kaei kaba nga don ban ong ka long ba ka Sorkar MDA ka la kren na ka por sha ka por ba ka Meghalaya ka dei kaba wan ha ka kyrdan ba ar ha ka roi ka par, hynrei ka roi ka par kam kyntiew ïa ka ïoh ka kot jong ki paidbah,” u la bynrap.
