Jowai, Ïaïong 13
Shibynta jong ka jingrakhe ïa ka jingdap 50 snem (Golden Jubilee), ka ophis Sub-Divisional Officer (Civil), Amlarem, ha ka 11 tarik Ïaïong ka la pynlong ïa ka ‘Exposure Visit’ ne ka jingleit jurip halor ka rukom pynïaid ïa ki jaboh jabaiñ ha Mawlai Mawroh bad ha ka jaka bret ñiut ha Marten ne ka Marten Waste Processing and Disposal Site (MWPDS), Shillong hapoh jong ka Clean Amlarem Campaign.
Ïa kane ka prokram la pynlong da ka ophis SDO (Civil), Amlarem ha ka jingïatreilang bad ka ophis Director, Urban Affairs and State Mission Director, Swachh Bharat Mission, Shillong.
Kane ka jingleit ka long shibynta jong ka jingrakhe ïa ka Jubili Ksiar jong ka Amlarem Sub Division kaba bat ïa ka burom ban long ka Sub Division kaba nyngkong eh ha Meghalaya ban poi sha une u mawjam.
Kane ka prokram ka thmu ban pynpaw pyrthei ïa ki nongïalam shnong, ki kynhun seng kynthei bad ki nongïashim bynta na ka thaiñ ïa ka rukom pynïaid ïa ki jaboh ha kane ka juk kaba mynta bad ban wad bniah kumno ban lah ban shim ïa ki juh ki sienjam ban pyntreikam ha ki sor rit bad ki thaiñ nongkyndong.
Haba ai jingkren sha ki nongïashim bynta ha ka prokram, u Myntri ka Sorkar bad MLA ka Amlarem u Bah Lahkmen Rymbui u la ban jur ba ka jingpynneh pynsah ïa ka jingkhuid jingsuba ka donkam ïa ka rukom treikam kaba ryntih ha kaba ïadei bad ka jingpynkhuid ïa ki jaboh jabaiñ.
“Watla ka shnong ne ka sor ka paw ba ka long kaba khuid, hynrei kan don tang khyndiat eh ka jingmut lada ym don ka rukom treikam kaba biang ban pynïaid ïa ki jaboh jabaiñ,” u la ong. U la pynpaw ruh ba ka jingpynkhuid ïa ki jaboh jabaiñ kam dei tang ka jingdonkam ha ka mariang hynrei ka dei ruh ka lad ban pynmih ïa ka lad kamai kajih.
U Myntri u la ong ruh ba la pynlong ïa kane ka jingleit jurip khnang ba ki nongïashim bynta na Amlarem kin ïoh jinghikai na ki rukom pynïaid ïa ki jaboh ba la pyntreikam ha Shillong, bad ban wad ki lad ki lynti ban pynwandur ïa ki rukom treikam ha la ki jong ki thaiñ. U la pynpaw ruh ïa ka jingsngew skhem ba ka Amlarem ka don ka lad ban kiew sha ka jaka sor ha ki por ki ban dang wan, bad kumta u la ban jur halor ka jingdonkam ïa ka plan kaba biang halor ka rukom pynkhuid ïa ki jaboh jabaiñ naduh kaba sdang.
La sdang ïa ka prokram da ka jingpyni ïa ki rukom treikam da u Assistant Engineer ka Shillong Municipal Board, u Bah F. B. Chyne uba la batai halor ka rukom pynlang ïa ki jaboh jabaiñ ba la pyntreikam ha ka nongbah Shillong bad ka jingtreikam jong ka jaka bret ñiut bad ka rukom pynïaid ïa ki jaboh ha Marten. U la pynpaw ruh ïa ka histori jong kane ka jaka bret ñiut kaba la treikam naduh u snem 1938 bad mynta ka la kylla long ka jaka bret ñiut ba kongsan na ka bynta ka nongbah Shillong.
Na ka liang ki ophisar ka Shillong Municipal Board ki la batai ba kane ka jaka bret ñiut ha Marten ka pynïaid haduh kumba 200 ton ki jaboh kiba mih man la ka sngi na sor Shillong, ha kaba kumba 185 ton ki poi sha ka jaka ha Marten ba pynïaid lyngba ka jingpynïakhlad bad ka jingpynkhreh kaba ryntih, haduh kumba 154 ton ki jaboh la pynkylla sha ki tiar kiba lah ban pyndonkam biang, kynthup 96 ton ba la pynkylla sha ka sboh, 41 ton la ïoh biang kum ki tiar kiba lah ban pyndonkam biang, kum ki ïit, ki nar, ki kot bad 17 ton kiba kynthup ïa ki jaboh plastik.
Ha ka jingïalang ïamir jingmut, u Bah Kampher Pohlong, Waheh Shnong ka Amlarem bad Secretary ka Synjuk ki Waheh Shnong War Jaiñtia u la pynpaw ba kane ka jingleit jurip ka la ïarap shibun ïa ki nongïashim bynta ba kin sngewthuh ïa ka jingdonkam ïa ka jingpynïakhlad ïa ki jaboh bad ka jingkordor kaba mih na ki jaboh ha ka liang ka ïoh ka kot.
Katba ka Kong Mary Mon Surong, Secretary ka Seng Kynthei Amlarem kaba dei kawei na ki nongïashim bynta ka la batai ïa kane ka jingleit jngoh kum ka jinghikai kaba kordor bad ka la pynpaw ba ïa ka jingtip ba la ïoh na kane ka prokram yn sa ïasam lang sha ki paidbah nongshong shnong, khamtam kito kiba pynïaid ïa ki kam ha ïew ha hat khnang ban pynshlur halor ka jingpynïakhlad ïa ki jaboh jabaiñ bad ban pynbha ïa ka rukom pynkhuid.
Ha kane ka ‘Exposure Trip’ ki la don baroh 25 ngut ki nongïashim bynta, kata kynthup ïa khyndai ngut ki shynrang bad khathynriew ngut ki kynthei na ki bynta bapher bapher jong ka thaiñ Amlarem, kynthup na ka shnong Mawlong.
