Nongpoh, Ïaïong 13
Ha kawei ka jingjia ha ka step sngi Nyngkong, uwei u samla na ka shnong Model Village jong ka thaiñ Jirang konstitwensi, u la khlad noh hashen hadien ba u la kum ïa tyngkhuh bad u sainar light uba la hap sha surok jong ka shnong Killing katba u dang ñiah ïa ka scooty.
Katkum ka tyllong khubor ba la ïohlum, la ïathuh ba katei ka jingjia ka dei ha ka por 6 baje ha ka step sngi Nyngkong ha kaba utei u samla uba la tip kyrteng kum u Robert M Marak, 23 snem ka rta, u la pan kylliang ïa ka scooty jong u paralok, kaba don ïa u registration number ML10-D-5378 na ka bynta ban leit donkam.
La ïathuh ruh ba namar ka jingkhlaiñ jong ka bording ba utei u sainar uba la hap bad ngat ïa u, utei u samla u la khlad noh hashen naba wat ki paidbah kiba ïohi bad lap ruh, kim shym la nud ban ïarap bad pyntip noh mar mar sha thanad Khanapara na ka bynta ban leh ïa kaba donkam katkum ki kyndon jong ka aiñ.
