Shillong, Ïaïong 13
Ka Dorbar Shnong Mawlyngngad ka la lum da ka Dorbar paidbah ha ka lah sngi u Blei na bynta ban pynsngew ïa ka rai ba la ïoh na ka ophis u Syiem ka Hima Khyrim ha ka 06 tarik u Ïaïong 2026 kaba pyntip ba ka jaka ba la khot ka ‘Lyntung’ ka dei kaba dang hap ha u pud synshar ka shnong Mawlyngngad.
Ïa kane ka jingïalang la pynlong ha madan phutbol shnong bad la pynlong da u Bah Morningstar Pyngrope, Sordar shnong ka shnong Mawlyngngad ha ka jingdonlang ki dkhot ka Executive Committee ka Dorbar Shnong ba mynta bad kiba rim kiba kynthup ïa u Bah P Nongkhlaw, Sordar barim, u Bah E Kharbihkhiew Sordar barim Mawlyngngad ha ryngkat kiwei de ki riew rangbah bad ki paidbah nongshong shnong.
Haba kren sha ki nongthoh khubor u Bah D Pyngrope Secretary shnong barim u la ïathuh ba ha kine ki khyndiat snem ba la dep ka la don ka jingïakajia pud hapdeng ka shnong Mawlyngngad bad ka Shnong Thadan,u la ong “Ha u snem 2020 ka shnong Thadan ka la phah jingthoh sha ka Raid Nongbri bad kam ba ka ‘Lyntung’ ka dei ka jong ki” haba ïadei bad kane ka shnong Mawlyngngad ruh khlem da pynslem ka la phah jingthoh sha ka Raid.
“Ha ka jingshisha ban pynïakhlad ïa ka shnong Mawlyngngad bad ka Shnong Thadan ka la don ka Wah Umngot bad dei na kane ba u Syiem Khyrim u la shim bishar ba ka ‘Lyntung’ ka hap hapoh u pud u sam ka jingpynïaid shnong ka Mawlyngngad,” u la ong.
Shuh-shuh la ong ba ha ka jingïasei ïa ki kot ki sla, ki sakhi sabut, u Syiem u la shim ïa ka rai ba katei ka jaka kaba dei jong ki Kur Lyngdoh Nongbri ka hap ha u pud synshar ka shnong Mawlyngngad bad dei ha ka 06 tarik u Ïaïong 2026 u Syiem u la pynmih ïa ka hukum ba katei ka jaka ka dei ban hap hapoh ka shnong Mawlyngngad.
Kum ka Dorbar Shnong ka pynpaw ka jingai khublei ïa u Syiem u ba la shimti ban pynbeit ryntih bad ban weng ïa ka jyrwit jyrwat hapdeng ki ar shnong, kumjuh ïa ka Raid Nongbri bad pynpaw ïa ka jingsngewnguh ïa ka jingïatreilang jong ki paidbah nongshong shnong.
