Shillong, Ïaïong 13
U State Vice-President ka BJP uba dei ruh u MDC ka Tura, u Bernard N. Marak, u la pynrem jur halor ka jingpynjulor ïa u mot dur jong U Trai Jisu Khrist ha Ïewbah Chibinang, da kaba ong ba ka long kaei-kaei kaba pynkyndit bad kaba pynkhuslai jingmut haduh katta-katta.
U Bernard, uba la leit jngoh dang shen ïa ka Chibinang bad ki shnong ba marjan kiba la shah ktah namar ka jingïakynad, u la ong, “Ki bynta kiba sah jong u mot dur ba la shah pynjulor ki long kum ka jingpynshisha kaba sngewsih kthang ïa kaei kaba paw – kaba long kum ka jingthombor kaba la thmu pyrshah ïa ki ‘riewngeit Khristan. Kum kine ki kam ym tang ba ki pynkheiñ ïa ka aiñ hynrei ki buh jingma ruh ïa ka shong suk shong shngaiñ hapdeng ki jaidbynriew bapher-bapher jong ka imlang-sahlang bad ka jinglong laitluid ha ka jingmane niam kaba la pyntikna da ka Riti-Synshar ka Ri India.”
“Katkum ka jingong jong ki nongshong shnong, la kynnoh ba u paidbhur – ba la ïathuh uba kynthup kham bun ïa ki nongwan buhai shnong be-aiñ – u la shah pynshit ha u MLA bad MDC barim, u Esmatur Mominin. La kynnoh ba u paidbhur u la don bynta ha ki kam pynkulmar kiba la saphriang kylleng, kynthup ka jingthang ïa ki dukan bad ki ïingsah jong ki briew, bad ban thombor-khnang ïa ki dak ba ïadei bad ki jingngeit niam, kynthup ïa ka jingpynjulor ïa u mot dur jong U Trai Jisu Khrist,” u la ong.
Na ka liang u Bernard u la pynpaw ruh ka jingsngewkhia ba ym shym la don ejahar ba la ujor, bad ba katei ka jingjia kam shym la mih ha ki lad pathai khubor, watla ka long kaba sngewkhia haduh katta-katta.
“Nga hi ngan shim ka sienjam ban ujor ejahar bad ban buddien katkum ka aiñ ba dei ban leh da kaba tyngeh pyrshah ïa baroh kito ki ‘riew shimet kiba donkti ha katei ka jingjia,” u la pyntikna.
