Shillong, Ïaïong 14
Ka Khasi Students’ Union (KSU) Laitumkhrah Unit ha ka janmiet jong ka 14 tarik u Ïaïong 2026, ka la ïoh ban bat ïa uwei u bar jylla uba kyrteng u Bulu Malakar uba dei napoh Assam Karimganj District uba sah hapoh Laitumkhrah New Colony.
Une u bar jylla u dei uba shu trei tang kum u ‘sales person’ hynrei uba kam ba u dei u ‘Pharmacist’ na kawei ka Pharmacy kaba kyrteng ka Meghalaya Pharmacy kaba don ha Laitumkhrah.
Ka seng ka la ïoh jingtip ba la don kawei ka Samla kynthei kaba leit thied dawai na ka bynta ka jingmong ka shyntur, hynrei la ïathuh ba une u bar jylla u la khot ïa ka shapoh ka kamra jong u doktor da kaba ong ba donkam ban pynthew BP bad nangta u la phah thiah ïa katei ka Samla ha jingthiah bad leh mynleh ban eksamin ïa ka, bad ha kata ka por hi u lah jrong kti ïa kane ka Samla bad la ktah ïa ka sha ki bynta bym dei ban ktah, bad ha kajuh ka por ruh u la pynhap ïa u chain patlun jong ka, da kaba thmu ban leh jubor ïa ka bad mar hangta ka la kyndit bad khie joit bad mareh nangta na Pharmacy.
Na ka liang kane ka Samla ka la pyntip mar-mar sha ki dkhot ka seng bad ha ka jingsynran lang jong ki seng samla shnong Laitumkhrah Pyllun bad ha ka jingdon u Secretary dong ka Upper New Colony la ïoh jingtip ba u dei u ba sah sha ka dong jong ka New Colony bad mar mar ki la rah ïa u sha Laitumkhrah PS.
Haba ïadei bad kane, na ka liang ka ïing ka sem ryngkat ka seng bad ka shnong hi ka la ai ka jingujor bad kumjuh ruh sha ka Women’s Commission pyrshah ïa une u bar jylla bad la shaniah ha ka tnad pulit ban leh ïa kaba donkam.
Ka KSU bad ka shnong Laitumkhrah ka la khang khyrdep syndon ïa kane ka Pharmacy mynta ka sngi bad ka maham ruh ban pynshitom ïa kum kine ki briew da kaba tyngeh, kiba thmu ba leh ïa kum kine ki jait kam.
