Shillong, Ïaïong 14
U Symbud Myntri Rangbah ka Jylla, u Bah Prestone Tynsong ha ka Sngi Ba-ar u la ong ba ka jingtohkit ha kaba ïadei bad ka jingpynjulor ïa u mot dur jong u Jisu ha Chibinang ha Ri-lum Garo ka dang ïaid shakhmat.
“Ngi la dep thaw ïa ka komiti tohkit halor kane,” la ong u Bah Prestone haba la kylli shaphang katei ka jingjia.
Ha kawei ka liang, u nongmihkhmat barim, u Esmatur Mominin u la pyndem noh hakhmat ki pulit ka Ri-Bhoi hadien ki ejahar ba la ujor pyrshah ïa u halor ka jingkynnoh donkti ban pynshit ïa ki jingkulmar ha Ri-lum Garo.
Haba kylli halor ka jingwan pyndem jong u Mominin, u Bah Prestone u la ong, “Ngam kwah ban ong eiei halor kane ïa mynta. Ai ba ka jingtohkit kan ïaid shakhmat namarba kam long kaba dei ïa nga ban ong eiei halor kane. Kumta to ngin ïa ap. Ka por kaba biang kan sa poi ha kaba phin sa lah ban tip tikna hangno ngi la poi.”
